ନବରଙ୍ଗପୁର:ଜିଲ୍ଲା ପାପଡ଼ାହାଣ୍ଡି ବ୍ଲକ ମୈଦଲପୁର ପଞ୍ଚାୟତ ଅନ୍ତର୍ଗତ ଗାଦବାକତରା ଗ୍ରାମରେ ସ୍ଥାନୀୟ ଗୃହରକ୍ଷୀଙ୍କ ଦାଦାଗିରି । ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହୋଇଛି l ସ୍ଥାନୀୟ ତୀର୍ଥବାସୀ ବିଷୋୟୀଙ୍କ ଘରେ ପଥର ମାଡ କରିବା ସହ ଟାଙ୍ଗିଆରେ ଘରର କବାଟକୁ ହାଣି ଭଙ୍ଗାରୁଜା କରିଛନ୍ତି l ମୈଦଲପୁର ଫାଣ୍ଡିରେ କାର୍ଯ୍ୟରତ ପଦୂବାନ ହରିଜନ ତାଙ୍କ ପୁଅ ଜୀତେନ୍ଦ୍ର ହରିଜନ ଓ ତାଙ୍କ ପରିବାର ମିଳିତ ଭାବରେ ଏଭଳି କାଣ୍ଡ ଘଟାଇଥିବାର ଭିଡ଼ିଓ ଭାଇରାଲ ହେବାରେ ଲାଗିଛି ।
ସୂଚନା ମୁତାବକ ଗାଦବାକତରା ଗ୍ରାମର ତୀର୍ଥବାସୀ ବିଷୋୟୀ ନିଜ ଜମିରେ ଚାଷ କରିବାକୁ ଯାଇଥିବା ସମୟରେ ଗୃହରକ୍ଷୀ ଜଣଙ୍କ ଉକ୍ତ ଜମିରେ ଚାଷ କଲେ ଜୀବନରୁ ମାରି ଦେବାକୁ ଧମକ ଦେବା ସହ ଗାଳିଗୁଲଜ କରି ଜମି ହଡପ କରିବାକୁ ପ୍ରୟାସ କରୁଛନ୍ତି l ଗୃହରକ୍ଷୀ ଜଣଙ୍କ ହରିଜନ ସମ୍ପ୍ରଦାୟ ହୋଇଥିବାରୁ ତୀର୍ଥବାସୀ ବିଷୋୟୀଙ୍କୁ ଓଲଟା ଜାତିଭିତ୍ତିକ ଆଟ୍ରୋସିଟି କେସ ମଧ୍ୟ କରିଛନ୍ତି । ଅନ୍ୟପଟେ ମୈଦଲପୁର ଫାଣ୍ଡି ଅଧିକାରୀ ତିର୍ଥବାସୀ ବିଷୋୟୀଙ୍କ ଅଭିଯୋଗକୁ ଗ୍ରହଣ କରୁ ନାହାନ୍ତି ଓ ଗାଳିଗୁଲଜ କରି ଫାଣ୍ଡିରୁ ତଡି ଦେଉଛନ୍ତି ବୋଲି ପରିବାର ଲୋକେ ମତବ୍ୟକ୍ତ କରିଛନ୍ତି । ତେବେ ଫାଣ୍ଡି ଅଧିକାରୀ ଅଭିଯୋଗକୁ ଗ୍ରହଣ ନ କରି ନିଜ କର୍ମଚାରୀଙ୍କୁ ସପକ୍ଷ ହୋଇ ସହଯୋଗ କରିବା କେତେଦୂର ଯୁକ୍ତିଯୁକ୍ତ ସେନେଇ ପ୍ରଶ୍ନବାଚୀ ସୃଷ୍ଟି ହୋଇଛି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
