ନବରଙ୍ଗପୁର: କୋରୋନା ଲକଡାଉନ ଉଜାଡ଼ି ଦେଇଛି ସାଧାରଣ ଲୋକଙ୍କ ଜୀବନ ଜୀବିକା । ଏଥିରେ ସିଧାସଳଖ ପ୍ରଭାବିତ ହୋଇଛନ୍ତି ଅଟୋ ଚାଳକ ଓ ମାଲିକମାନେ । ନବରଙ୍ଗପୁର ଜିଲ୍ଲାର ଡାବୁଗାଁ ବ୍ଲକର ଜୟ ଭାରତ ୟୁନିୟନର ଅଟୋ ଚାଳକ ଓ ମାଲିକମାନଙ୍କ ଦୁଃଖ ଏବେ କହିଲେ ନସରେ । ଘରୁ ବାହାରକୁ ଗାଡି ନେଇ ଗଲେ ସେମାନଙ୍କର ଘରେ ଚୁଲି ଜଳୁଥିଲା । କିନ୍ତୁ ଲକଡାଉନ ହେବାପରେ ସବୁ କିଛି ଯେମିତି ଉଜୁଡି ଯାଇଛି ।
ଲକଡାଉନ ଛଡାଇନେଲା ଜୀବିକା
ଲକଡାଉନ ଖୋଲିବା ପରେ ମଧ୍ୟ ଯେଉଁଭଳି ଭାବେ ଏମାନଙ୍କୁ ଭଡା ମିଳୁଥିଲା, ତାହା ଆଗକୁ ମିଳିବ କି ନାହିଁ ଏମାନଙ୍କ ପାଇଁ ଏକ ଚିନ୍ତାର ବିଷୟ ପାଲଟିଛି । ଏପରିକି ଜିଲ୍ଲା ପ୍ରଶାସନ ତରଫରୁ କୌଣସି ସାହାଯ୍ୟ ମଧ୍ୟ ମିଳୁନାହିଁ । ତେଣୁ ରାଜ୍ୟ ସରକାରଙ୍କୁ ସହାୟତା ପାଇଁ ଦାବି କରିଛନ୍ତି । ରାଜ୍ୟରେ ପ୍ରାୟ ଦେଢ଼ ଲକ୍ଷରୁ ଅଧିକ ଅଟୋ ରହିଥିବା ବେଳେ ଗୋଟିଏ ବି ଅଟୋ ଗଡୁନି । ଦୀର୍ଘ ୩୦ ଦିନ ହେବ କୋରୋନା ନିମନ୍ତେ ଏଭଳି ଅବସ୍ଥା ହୋଇଥିବା ବେଳେ ଆଗକୁ ଆଉ କେତେଦିନ ବନ୍ଦ ରହିବ ତାହା ବି କହିବା ମୁସ୍କିଲ ।