ନବରଙ୍ଗପୁର: ମଦ ଦୋକାନ କର୍ମଚାରୀଙ୍କ ସଂଘବଦ୍ଧ ଆକ୍ରମଣରେ ଗ୍ରାହକ ଗୁରୁତର । ଗୁରୁତର ଅବସ୍ଥାରେ ତାଙ୍କୁ ଜିଲ୍ଲା ମୁଖ୍ୟ ମେଡିକାଲରେ ଭର୍ତ୍ତି କରାଯାଇଛି । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ପାପଡାହାଣ୍ଡିରେ ଥିବା ଏକ ବିଦେଶୀ ମଦ ଦୋକାନରେ। ସେପଟେ,ଘଟଣାକୁ ନେଇ ପାପଡାହାଣ୍ଡି ଗ୍ରାମବାସୀ ଜିଲ୍ଲାପାଳଙ୍କ ଦ୍ବାରସ୍ଥ ହୋଇଛନ୍ତି । ଦୋକାନୀଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ସହ ଦୋକାନରେ ଦର ତାଲିକା ମାରିବାକୁ ଲୋକେ ଦାବି କରିଛନ୍ତି । ସମସ୍ୟାର ସମାଧାନ କରାଯିବ ବୋଲି ଜିଲ୍ଲାପାଳ ଡ.କମଳ ଲୋଚନ ମିଶ୍ର ପ୍ରତିଶ୍ରୁତି ଦେଇଛନ୍ତି।
ମଦ ଦୋକାନ କର୍ମଚାରୀଙ୍କ ସଂଘବଦ୍ଧ ଆକ୍ରମଣରେ ଗ୍ରାହକ ଲହୁଲୁହାଣ ଅଭିଯୋଗ ଅନୁସାରେ, ଶୁକ୍ରବାର ରାତିରେ ପାପଡାହାଣ୍ଡି ଗାଁର ଅଲେଖ ସ୍ବାଇଁ ବିଦେଶୀ ମଦ ଦୋକାନରୁ ମଦ କିଣିବାକୁ ଯାଇଥିଲେ । ଏମ୍ଆରପିରୁ ଦୋକାନୀ ଅଧିକ ଟଙ୍କା ଦାବି କରିବାରୁ କର୍ମଚାରୀ ଓ ଅଲେଖଙ୍କ ମଧ୍ୟରେ ବଚସା ହୋଇଥିଲା । ପରେ ଏହା ଉଗ୍ର ରୂପ ନେଇଥିଲା । ଏଥିରେ ଉତ୍ୟକ୍ତ ହୋଇ ଦୋକାନର ୫ଜଣ କର୍ମଚାରୀ ଅଲେଖଙ୍କୁ ଦୋକାନ ଭିତରକୁ ଟାଣିନେଇ ନିସ୍ତୁକ ମାଡ଼ ମାରିଥିଲେ । କର୍ମଚାରୀଙ୍କ ଆକ୍ରମଣରେ ଅଲେଖ ଗୁରୁତର ହୋଇଥିଲା । ପରେ ତାଙ୍କୁ ଉଦ୍ଧାର କରାଯାଇ ମେଡ଼ିକାଲରେ ଭର୍ତ୍ତି କରାଯାଇଥିଲା ।
ଏହି ଘଟଣାକୁ ବିରୋଧ କରି ପାପଡାହାଣ୍ଡି ଗାଁ ଲୋକେ ଜିଲ୍ଲାପାଳଙ୍କୁ ଭେଟି ଗୁହାରି ଜଣାଇଥିଲେ । ମଦ ଦୋକାନୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ । ଏଥିସହ ଦୋକାନରେ ଦର ତାଲିକା ଲଗାଇବାକୁ ଦାବି କରିଛନ୍ତି । ନିୟମିତ ଦୋକାନରେ ଚଢ଼ଉ ହେଉନଥିବା ମଧ୍ୟ ଅଭିଯୋଗ ହୋଇଛି । ଅଲେଖଙ୍କ ଏତଲାକୁ ଭିର୍ତ୍ତି କରି ପୋଲିସ ମଦ ଦୋକାନର ଦୁଇ ଜଣ କର୍ମଚାରୀଙ୍କୁ ଗିରଫ କରି କୋର୍ଟ ଚାଲାଣ କରିଛି ।
