ନବରଙ୍ଗପୁର : ପରିବାର ବୋଝକୁ ମୁଣ୍ଡରେ ମୁଣ୍ଡାଇ ପରିବାର ସଦସ୍ୟଙ୍କ ପାଟିକୁ ଟିକେ ଦାନା ପେଟକୁ ଚାଖଣ୍ଡେ କନା ଦେବାପାଇଁ ଦାଦନ ଖଟିବାକୁ ଯାଉଥିଲେ ରାଜ୍ୟ ବାହାରକୁ । ହେଲେ କିଏ ଜାଣିଥିଲା ଯେ ଏହି ଯାତ୍ରା ତାଙ୍କ ପାଇଁ ହେବ ଶେଷ ଯାତ୍ରା । ଦାଦନ ପାଇଁ ଯିବା ସମୟରେ ଘଟିଥିବା ଅଘଟଣକୁ ନେଇ ଆଜି ନିସ୍ତବ୍ଧ ହୋଇ ପଡିଛି ନବରଙ୍ଗପୁର ଜିଲ୍ଲା । ବୋଡୁଗୁଦେମ୍ ନିକଟରେ ବସ ଦୁର୍ଘଟଣାରେ ମୃତ୍ୟୁ ହୋଇଥିବା ନବରଙ୍ଗପୁର ଜିଲ୍ଲାର ଦୁଇ ଭାଇ, ଭଉଣୀ, ଶିଶୁ ଓ ଜଣେ ଶ୍ରମିକଙ୍କ ମୃତଦେହ ଆସି ପହଞ୍ଚିଛି ।
ଏଠାରେ ସୁଚନା ଯୋଗ୍ୟଯେ ଗତକାଲି ଭବାନୀପାଟଣାରୁ ବିଜେୱାଡା ଅଭିମୁଖେ ଯାଉଥିବା ବସଟି ଆନ୍ଧ୍ରପ୍ରଦେଶ ସୀମାନ୍ତ ଚିନ୍ତୁର ଥାନା ଅନ୍ତର୍ଗତ ବୋଡୁଗୁଦେମ୍ ନିକଟରେ ଓଲଟି ପଡିଥିଲା । ସେଥିରେ ୫ଜଣଙ୍କ ମୃତ୍ୟୁ ହୋଇଥିବା ବେଳେ ୪୦ଜଣ ଆହତ ହୋଇଥିଲେ । ମୃତକ ମାନଙ୍କ ମଧ୍ୟରେ ନବରଙ୍ଗପୁର ଜିଲ୍ଲାର ୩ଜଣ ଥିଲେ ।
ସୂଚନାନୁସାରେ ନବରଙ୍ଗପୁର ବ୍ଲକ ବଡ଼ ମସିଗାଁ ପଞ୍ଚାୟତ ଅନ୍ତର୍ଗତ ଭାଟିଗୁଡା ଗାଁର ଡ଼ୁମର ହରିଜନ(୩୭)ଙ୍କ ପରିବାର କହିଲେ ସ୍ତ୍ରୀ, ଦୁଇ ଝିଅ ଗୋଟିଏ ପୁଅ ଓ ବୁଢ଼ୀ ମା'l ଘରେ ବୁଢ଼ୀ ମା' ଓ ବଡ଼ ପୁଅକୁ ଛାଡି ସ୍ତ୍ରୀ ଓ ଦୁଇ କୁନି ଝିଅକୁ ନେଇଯାଉଥିଲେ ଦାଦନ ଖଟିବାକୁ ତେଲେଙ୍ଗାନା l ହେଲେ ଯିବା ବେଳେ ବାଟରେ ବସ୍ ଦୁର୍ଘଟଣା ହୋଇ ଘଟଣା ସ୍ଥଳରେ ଡ଼ୁମରଙ୍କ ମୃତ୍ୟୁ ହୋଇଥିବା ବେଳେ ସ୍ତ୍ରୀ ଓ ଦୁଇ ଝିଅକୁ ସ୍ଥାନୀୟ ଲୋକେ ଉଦ୍ଧାର କରି ନିକଟସ୍ଥ ମେଡିକାଲରେ ଭର୍ତ୍ତି କରାଇଥିଲେ l