ନବରଙ୍ଗପୁର:ବଟି ଆଦାୟ ଓ ଧମକ ଅଭିଯୋଗରେ ମହିଳା ସାମ୍ବାଦିକା ଗିରଫ । ମହିଳା ସାମ୍ବାଦିକା ମାମୁନି ଚକ୍ରବର୍ତ୍ତୀଙ୍କୁ ଗିରଫ କରିଛି ରାଇଘର ପୋଲିସ । ଗିରଫ ପରେ କୋର୍ଟ ଚାଲାଣ କରିଥିବା ନେଇ ସାମ୍ବାଦିକ ସମ୍ମିଳନୀରେ ସୂଚନା ଦେଲେ ଉମରକୋଟ ଏସଡିପିଓ ।
ସୂଚନାଅନୁଯାୟୀ ନବରଙ୍ଗପୁର ଜିଲ୍ଲା ରାଇଘରର ମାମୁନି ଚକ୍ରବର୍ତ୍ତୀ ଏକ ନିର୍ଦ୍ଦିଷ୍ଟ ୱେବ ଚ୍ୟାନେଲ ଓ ଦୈନିକ ଖବର କାଗଜ ପାଇଁ ବ୍ଲକ୍ ପ୍ରତିନିଧି ଭାବରେ କାର୍ଯ୍ୟ କରୁଥିଲେ। ସେ ବ୍ଲକର ବିଭିନ୍ନ ଅଞ୍ଚଳ ବୁଲି ସରକାରୀ କର୍ମଚାରୀ, ଠିକାଦାର ଏବଂ ବ୍ୟବସାୟୀଙ୍କୁ ବିଭିନ୍ନ ପ୍ରକାର ଧମକ ଚମକ ଦେଇ ବଟି ଆଦାୟ କରୁଥିବାର ଅଭିଯୋଗ ହୋଇଆସୁଥିଲା । ତେବେ ହଳଦୀ ପଞ୍ଚାୟତ ଅନ୍ତର୍ଗତ ବିଜଲିପାରା ଗ୍ରାମରେ ନିର୍ମିତ ହୋଇ ସାରିଥିବା ଏକ ପ୍ରଧାନମନ୍ତ୍ରୀ ଆବାସ ଗୃହକୁ କେନ୍ଦ୍ର କରି ଗୋନା ଗ୍ରାମର ଠିକାଦାର ଜଗନ୍ନାଥ ନାୟକଙ୍କ ପତ୍ନୀ ସୁମୀତ୍ରା ନାୟକଙ୍କୁ ଫୋନ୍ ଯୋଗେ ବିଭିନ୍ନ ପ୍ରକାର ଧମକ ଚମକ ଦେଇଥିଲେ। ଏହା ସହ ୧୦ ହଜାର ଟଙ୍କା ନ ଦେଲେ ତ ସ୍ବାମୀଙ୍କ ନାମରେ ଖବର ପରିବେଷଣ କରି ସାମାଜିକ ଗଣମାଧ୍ୟମରେ ଭାଇରାଲ କରି ଦେବାର ଧମକ ଦେଇଥିଲେ ମାମୁନୀ । ବାରମ୍ବାର ଧମକକୁ ସହ୍ୟ କରି ନ ପାରି ଶେଷରେ ରାଇଘର ଥାନାରେ ଲିଖିତ ଅଭିଯୋଗ କରିଥିବା କହିଛନ୍ତି ସୁମିତ୍ରା ନାୟକ ଓ ଠିକାଦାର ଜଗନ୍ନାଥ ନାୟକ ।