ନବରଙ୍ଗପୁର: ଜୟ ଯବାନ, ଜୟ କିଷାନ..। ପୂର୍ବତନ ପ୍ରଧାନମନ୍ତ୍ରୀ ଲାଲ ବାହାଦୁର ଶାସ୍ତ୍ରୀଙ୍କ ଏହି ଉକ୍ତିକୁ ଅକ୍ଷର ଅକ୍ଷରେ ପାଳନ କରିଛନ୍ତି ଅବସର ପ୍ରାପ୍ତ ମେଜର ବିଜୟ କୁମାର ପାଠକ । ଭାରତୀୟ ସେନା ବାହିନୀରୁ ଅବସର ନେଲା ପରେ ବିଜୟ ପାଠକ ଆଜି ଜଣେ ସଫଳ ଚାଷୀ ।
ସେଥିଲେ ଭାରତୀୟ ସେନା ବାହିନୀର ଜଣେ ଉଚ୍ଚପଦସ୍ତ ଅଫିସର । ଧନ, ସମ୍ପତ୍ତିରେ କୌଣସି ଅଭାବ ନଥିଲା । ଭାରତୀୟ ସେନାରେ ଥିବାରୁ ଦେଶର ବିଭିନ୍ନ ଅଞ୍ଚଳକୁ ଯିବାକୁ ପଡୁଥିଲା । ଆଉ ଏହା ଭିତରେ ସେ ଆସି ପହଞ୍ଚିଥିଲେ କୋରାପୁଟର ସୁନାବେଡା ଅଞ୍ଚଳରେ । ସେଠାରେ ବହୁଦିନ ଧରି ଅବସ୍ଥାପିତ ଥିଲେ ବିଜୟ । କୋରାପୁଟ ନବରଙ୍ଗପୁର ଭଳି ପ୍ରାକୃତିକ ପରିବେଶରେ ନିଜେ ବାନ୍ଧି ହୋଇଗଲେ । ଆଉ ନନ୍ଦାହାଣ୍ଡି ଅଞ୍ଚଳରେ କିଛି ଜମି କିଣିଲେ ।
ପରେ 2005 ବେଳକୁ ଆରମ୍ଭ କଲେ ଏକ ଛୋଟିଆ ଗୋଶାଳା । ଧୀରେ ଧୀରେ ଆଗକୁ ବଢିଲା ଏହି ଗୋଶାଳା । ଗତ 2015 ରେ ବିଜୟ ସେନାରୁ ଅବସର ନେଲା ପରେ ନିଜେ ସାଜିଲେ ଗୋପାଳ । 10ଟି ଗାଈରୁ ଆରମ୍ଭ ହୋଇଥିବା ଏହି ଫାର୍ମ ଆଜି ଏକଶହ ଗାଈରେ ଆସି ପହଞ୍ଚିଛି । ବିଜୟଙ୍କ ଫାର୍ମରୁ ସମସ୍ତ ଦୁଗ୍ଧ ଜାତ ଦ୍ରବ୍ୟ ଯଥା- କ୍ଷୀର, ଘିଅ, ଦହି ଓ ପନିର ପ୍ରସ୍ତୁତ ହେଉଛି ।