ହାଇଦ୍ରାବାଦ: ଏବେ ସାନ ଭଉଣୀ ସାଗରିକାକୁ ଫେରି ପାଇବ ପ୍ରିୟଙ୍କା । ବେସାହାରା ପ୍ରିୟଙ୍କା ପାଣିଗ୍ରାହୀର କୋହଭରା ହୃଦୟ ପୁଣି ଖୁସିରେ ଫାଟି ପଡ଼ିବ । ବାପା ମାଆକୁ ହରାଇଥିବା ଏହି ଦୁଇ ଅନାଥ ଭଉଣୀ ଏବେ ଦୁହେଁ ଦୁହିଁଙ୍କୁ ପୁଣି ଫେରିପାଇବେ । ତେଲେଙ୍ଗାନାର ଏକ ଇଟାଭାଟିରେ ବନ୍ଧକ ରହିଥିବା ସାଗରିକା ଆଜି ଫେରିଯାଇଛି ନିଜ ଗାଁ ନବରଙ୍ଗପୁର ଚନ୍ଦାହାଣ୍ଡିର କେନାଲ ସାହିକୁ । ‘ଇଟିଭି ଭାରତ’ରେ ପ୍ରଥମେ ଏହି କୁନି ଝିଅର କରୁଣ କାହାଣୀ ପ୍ରସାରିତ ହେବାପରେ ସହାୟତାର ହାତ ବଢାଇଥିଲେ ନବରଙ୍ଗପୁରର ପୂର୍ବତନ ସାଂସଦ ପ୍ରଦୀପ ମାଝୀ ।
ପରିବାରର ଆର୍ଥିକ ସ୍ଥିତି ଭଲ ନଥିବାବେଳେ ଅର୍ଥ ରୋଜଗାର ଅନ୍ବେଷଣରେ ତେଲେଙ୍ଗାନାର ଏକ ଇଟାଭାଟିକୁ କାମ କରିବାକୁ ଆସିଥିଲା ମା' ଅନାଦି ପାଣିଗ୍ରାହୀ ଓ ସାନ ଝିଅ ସାଗରିକା ପାଣିଗ୍ରାହୀ । ଅସ୍ବାଭାବିକ ଭାବରେ ମା'ର ଦେହ ଅସୁସ୍ଥ ହେବାରୁ ଇଟାଭାଟି ମାଲିକ ଅନାଦିକୁ ପଠାଇ ଦେଇଥିଲା । କିନ୍ତୁ ଧାର କରିଥିବା ଟଙ୍କା ପାଇଁ ବନ୍ଧକ ରହିଯାଇଥିଲା ସାଗରିକା । ସେପଟେ ସାନ ଭଉଣୀକୁ ଫେରାଇ ଆଣିବା ପାଇଁ ପ୍ରଶାସନ ଠାରୁ ଆରମ୍ଭ କରି ବିଭିନ୍ନ ଗଣମାଧ୍ୟମ ପାଖରେ ଗୁହାରୀ କରିଥିଲା ବଡ଼ ଭଉଣୀ ପ୍ରିୟଙ୍କା । କିନ୍ତୁ କାହାରି କାନରେ ଏହି କରୁଣ ଚିତ୍କାର ବାଜିନଥିଲା ।