ନବରଙ୍ଗପୁର: ନବରଙ୍ଗପୁରକୁ ପୁଣି ଫେରିଲା ଝାଡ଼ାବାନ୍ତି । ଜିଲ୍ଲାରେ କିଛି ଦିନର ବ୍ୟବଧାନ ପରେ ପୁଣି ଫେରିଛି ଝାଡ଼ାବାନ୍ତି । କିନ୍ତୁ ଏଥର ଚିତ୍ର ଟିକିଏ ଅଲଗା ରହିଛି । ମଫସଲିଆ ଗାଁ ମାନଙ୍କରେ ଏହି ରୋଗ ସଂକ୍ରମିତ ହେଉଥିବା ବେଳେ ଏଥର ଗୋଟିଏ ୱାର୍ଡରେ ପ୍ରାୟ ସମସ୍ତ ଝାଡ଼ା ବାନ୍ତିରେ ଆକ୍ରାନ୍ତ ହୋଇଛନ୍ତି । ଖବର ମିଳିବା ପରେ ମେଡିକାଲ ଟିମ ପହଞ୍ଚି ସ୍ଥିତି ତଦାରଖ କରିବା ସହ ପ୍ରାଥମିକ ଉପଚାର ଜାରି ରଖିଛି l ସ୍ଥିତି ନିୟନ୍ତ୍ରଣାଧୀନ କହିଲେ ADMO ।
ନବରଙ୍ଗପୁର ପୌରପାଳିକା ଅନ୍ତର୍ଗତ ୧୩ ନମ୍ବର ୱାର୍ଡ ଗାଦବାଗୁଡାରେ ଗତ ୨ ଦିନ ହେଲା ବ୍ୟାପିଛି ଝାଡାବାନ୍ତି l ଜଣକ ପରେ ଜଣେ ଘରକୁ ଘର ପ୍ରାୟତଃ ୨୦ରୁ ଅଧିକ ଆକ୍ରାନ୍ତ ହୋଇଥିବା ସୂଚନା ମିଳିଛି । ଗୁରୁତର ୮ ଜଣକୁ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରା ଯାଇଛି । ସାହି ମଧ୍ୟରେ ଥିବା ନଳକୂପ ଗୁଡିକ ନିୟମିତ ବିଶୋଧନ କରାଯାଉ ନାହିଁ । ଜଳ ଯୋଗାଣ ପାଇପଗୁଡ଼ିକ ନାଳ ମଧ୍ୟରେ ରହିଥିବାରୁ ପାଇପ୍ ଫାଟି ନର୍ଦ୍ଦମାର ଦୂଷିତ ପାଣି ମିଶି ଘରକୁ ଯାଉଛି । ସେହି ପାଣିକୁ ବ୍ୟବହାର କରିବା ଦ୍ବାରା ଝାଡାବାନ୍ତି ବ୍ୟାପିଥିବା ଆଶଙ୍କା କରାଯାଉଛି ।