ନବରଙ୍ଗପୁର: ରାଜ୍ୟରେ କୋଭିଡ-୧୯ର ଦ୍ବିତୀୟ ପର୍ଯ୍ୟାୟ ସଂକ୍ରମଣ ଏବେ ନିୟନ୍ତ୍ରଣ ବାହାରକୁ ଯିବା ସ୍ଥିତିରେ ପହଞ୍ଚିଛି । ସମୟ ଯେତିକି ଗଡୁଛି, ସଂକ୍ରମିତ ତାଲିକା ସେତିକି ଲମ୍ବୁଛି । ସେହିପରି ନବରଙ୍ଗପୁର ଜିଲ୍ଲାରେ ମଧ୍ୟ କୋରୋନାର ଦ୍ବିତୀୟ ଲହରୀ ଦ୍ରୁତ ଗତିରେ ବ୍ୟାପୁଛି । ଜିଲ୍ଲାରେ ଲଗାତାର ଭାବେ କୋରୋନା ଗ୍ରାଫ ଉପର ମୁହାଁ ହୋଇ ଚାଲିଛି ।
ସୋମବାର ଜିଲ୍ଲାରେ ପୁଣି ସର୍ବାଧିକ 80 ଜଣ କୋରୋନା ପଜିଟିଭ ଚିହ୍ନଟ ହୋଇଛନ୍ତି। ଏହାକୁ ମିଶାଇ ଜିଲ୍ଲାରେ ସକ୍ରିୟ ଆକ୍ରାନ୍ତଙ୍କ ସଂଖ୍ୟା 313ରେ ପହଞ୍ଚିଛି। ସୋମବାର ଚିହ୍ନଟ ହୋଇଥିବା ଆକ୍ରାନ୍ତଙ୍କ ମଧ୍ୟରେ ସର୍ବାଧିକ ରାଇଘର ବ୍ଲକରୁ 25 ଜଣ, ଚନ୍ଦାହାଣ୍ଡି ବ୍ଲକରୁ 17 ଜଣ, ଉମରକୋଟ ବ୍ଲକରୁ 8 ଜଣ, ପାପଡାହାଣ୍ଡି ବ୍ଲକରୁ 7 ଜଣ ଓ ନବରଙ୍ଗପୁର ବ୍ଲକରୁ 6 ଜଣ ନୂଆ ସଂକ୍ରମିତ ଚିହ୍ନଟ ହୋଇଛନ୍ତି ।