ନବରଙ୍ଗପୁର: ରାଜ୍ୟରେ କୋରୋନା ଦ୍ରୁତ ବେଗରେ ବଢ଼ି ଚାଲିଥିବା ବେଳେ ସରକାର ଜୀବନ ଏବଂ ଜିବିକା ଉଭୟକୁ ଗୁରୁତ୍ବ ଦେଉଛନ୍ତି । କିନ୍ତୁ ନିଜ ଉତ୍ପାଦିତ ଦୁଗ୍ଧକୁ ବିକ୍ରୀ କରି ନପାରି ଏବେ ହନ୍ତସନ୍ତ ହେଉଛନ୍ତି ନବରଙ୍ଗପୁର ଜିଲ୍ଲା ଝରିଗାଁ ବ୍ଲକ ଧଡ୍ରା ଗ୍ରାମର ଦୁଗ୍ଧ ଚାଷୀ । ଧଡ୍ରା ଠାରେ ରହିଥିବା ଦୁଗ୍ଧ ଶୀତଳିକରଣ କେନ୍ଦ୍ର ଉପରେ ନିର୍ଭର କରନ୍ତି ଝରିଗାଁ ବ୍ଲକର ଧଡ୍ରା, ପୂର୍ଲା, କାରାଗାଁ ସହିତ ଅନେକ ଗ୍ରାମର ଦୁଗ୍ଧ ଚାଷୀ । ପ୍ରତିଦିନ ଏଠାକୁ ଆସେ ପ୍ରାୟ 950 ଲିଟର ଦୁଗ୍ଧ । କିନ୍ତୁ ବର୍ତ୍ତମାନ କୋରୋନା ଯୋଗୁଁ ଓମ୍ଫେଡ୍ ଚାଷୀଙ୍କ ଠାରୁ ଗ୍ରହଣ କରୁନି ଦୁଗ୍ଧ ।
ଦୁଗ୍ଧର ମାନ ଖରାପ ଦର୍ଶାଇ ଫେରାଇ ଦେଉଛି ସଂସ୍ଥା । ସଂସ୍ଥାର ସୁପର ଭାଇଜର କହିଛନ୍ତି ଦୁଗ୍ଧର ମାନ ୪ ପଏଣ୍ଟ ଫେଟ ଓ ଲାକ୍ଟୋମିଟର ୨୭ ଆବଶ୍ୟକ । କିନ୍ତୁ ଚାଷୀ ଯେଉଁ ଦୁଗ୍ଧ ଆଣୁଛନ୍ତି ତାହା ନିୟମ ଅନୁସାରେ ନାହିଁ ତେଣୁ ମୁଁ ଦୁଗ୍ଧ ରଖିବି ନାହିଁ ବୋଲି କହୁଛନ୍ତି । ଏପଟେ ଚାଷୀ କହୁଛନ୍ତି ଯେ ସୁପର ଭାଇଜର କିଛି ଦୁଗ୍ଧ ବେପାରୀଙ୍କ ଠାରୁ ଦୁଗ୍ଧ ରଖି ନିଜ ଟାର୍ଗେଟ ପୁରଣ କରୁଛନ୍ତି ଓ ଚାଷୀଙ୍କ ଦୁଗ୍ଧକୁ ଫେରାଇ ଦେଉଛନ୍ତି । ଦୁଗ୍ଧ ନେବାର ୪ ରୁ ୫ ଦିନ ପରେ ଦୁଗ୍ଧ ଖରାପ ବାହାରିବା ଦର୍ଶାଇ ଟଙ୍କା କାଟି ଦିଆଯିବ ବୋଲି ମଧ୍ୟ କହୁଛନ୍ତି ।