ନବରଙ୍ଗପୁର: ଭାଲୁ ଆକ୍ରମଣରେ ମୃତ ବ୍ୟକ୍ତିର ପରିବାରକୁ ବନ ବିଭାଗ ପକ୍ଷରୁ ସହାୟତା ରାଶି ପ୍ରଦାନ । ଏ ନେଇ ଡାବୁଗାଁ ବନ ବିଭାଗ ତରଫରୁ ମୃତକଙ୍କ ପରିବାରକୁ ୪ ଲକ୍ଷ ଟଙ୍କାର ସହାୟତା ରାଶି ପ୍ରଦାନ କରାଯାଇଛି ।
ଡାବୁଗାଁ ଥାନା ଅନ୍ତର୍ଗତ ହଳଦୀ ଗ୍ରାମର ନରସିଂହ ଜାନି ଗତ ଜୁଲାଇ ୨୦୧୯ ମସିହାରେ ଭାଲୁ ଆକ୍ରମଣରେ ମୃତ୍ୟୁ ବରଣ କରିଥିଲା । ନବରଙ୍ଗପୁର ବନଖଣ୍ଡ ଅଧିକାରୀ ରଞ୍ଜିତ କୁମାର ମଲ୍ଲିକଙ୍କ ନିର୍ଦ୍ଦେଶ କ୍ରମେ ଗୁରୁବାର ଡାବୁଗାଁ ବନାଞ୍ଚଳ କାର୍ଯ୍ୟାଳୟରେ ବନାଞ୍ଚଳ ଅଧିକାରୀ ସେତୁ ରଞ୍ଜନୀ ଗମାଙ୍ଗ, ଡାବୁଗାଁ ବ୍ଲକ୍ ଚଚରାଗୁଡ଼ା ସରପଞ୍ଚ ଧରମା ନନ୍ଦ ନାୟକ, ଡାବୁଗାଁ ବନପାଳ ଲକ୍ଷ୍ମୀକାନ୍ତ ସାହୁଙ୍କ ଉପସ୍ଥିତିରେ ଭାଲୁ ଆକ୍ରମଣରେ ମୃତ ନରସିଂହ ଜାନିର ପତ୍ନୀ ପାର୍ବତୀ ଜାନି ପୁଅ ଗଣେଶ ଜାନିକୁ ୪ ଲକ୍ଷ ଟଙ୍କାର ଏକ ସହାୟତା ରାଶି ଚେକ୍ ପ୍ରଦାନ କରାଯାଇଛି ।