ସ୍କୁଲ ସାମ୍ନାରୁ ଛାତ୍ରୀଙ୍କୁ ଅପହରଣ ଅଭିଯୋଗ

ଛାତ୍ରୀଙ୍କୁ ସ୍କୁଲ ସାମ୍ନାରୁ ଅପହରଣ ଅଭିଯୋଗ । ଥାନାରେ ମାମଲା । ଅଧିକ ପଢନ୍ତୁ....

ନବରଙ୍ଗପୁର:ଛାତ୍ରୀଙ୍କୁ ସ୍କୁଲ ସାମ୍ନାରୁ ଅପହରଣ କରାଯାଇଥିବା ଅଭିଯୋଗ ହୋଇଛି । ଏନେଇ ଛାତ୍ରୀଙ୍କ ପରିବାର ଲୋକେ ନବରଙ୍ଗପୁର ଟାଉନ ଥାନାରେ ଏଭଳି ଅଭିଯୋଗ କରିଛନ୍ତି। ସୂଚନା ଅନୁଯାୟୀ ହିରଲୀ ଗାଁ ନିକଟ ଆଦର୍ଶ ବିଦ୍ୟାଳୟର ଜଣେ ଦଶମ ଶ୍ରେଣୀ ଛାତ୍ରୀ ଶିକ୍ଷକଙ୍କ ଠାରୁ ପାଠ ବୁଝିବାକୁ ନିଜ ସହପାଠୀଙ୍କ ସହ ବିଦ୍ୟାଳୟକୁ ଆସିଥିଲେ । ୪ଟା ରେ ସ୍କୁଲ ଛୁଟି ହେବା ପରେ ସେ ସାଙ୍ଗ ସହିତ ଦେଉଳା ଗାଁ ଘରକୁ ଯାଉଥିବା ସମୟରେ ବାଇକରେ ଏକ ମୁଖା ପିନ୍ଧା ଯୁବକ ଆସି ଧମକ ଚମକ ଦେଇ ତାଙ୍କୁ ଜବରଦସ୍ତି ଉଠାଇ ନେଇଥିଲା ।

ଏହାକୁ ନେଇ ସହପାଠୀ ଜଣକ ଚିତ୍କାର କରିବାରୁ ତାଙ୍କୁ ହତ୍ୟାର ଧମକ ଦେଇଥିଲା ମୁଖା ପିନ୍ଧା ଯୁବକ । ସହପାଠୀ ଛାତ୍ରୀ ଜଣକ ଭୟଭୀତ ହୋଇ ଏହି ବିଷୟ ସମସ୍ତ ପରିବାର ଲୋକଙ୍କୁ ଜଣାଇବା ପରେ ପରିବାର ଲୋକେ ଏ ନେଇ ଥାନା ରେ ଏତଲା ଦେଇଛନ୍ତି । ନବରଙ୍ଗପୁର ଟାଉନ ପୋଲିସ ତଦନ୍ତ ଆରମ୍ଭ କରି ବିଭିନ୍ନ ସ୍ଥାନରେ ଚଢ଼ାଉ ଆରମ୍ଭ କରିଛି ।

ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ