ମକା ଚାଷ ପାଇଁ ଛୁରା ମାଡ, ଯୁବକ ଗୁରୁତର

ସାମାନ୍ୟ ମକା ଚାଷ ପାଇଁ ଛୁରା ମାଡ । ଗୁରୁତର ଯୁବକଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି । ଏହାସହ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ପୋଲିସ ।

ନବରଙ୍ଗପୁର: ଜିଲ୍ଲାର ରାଇଘର ବ୍ଲକ ଅଧିନସ୍ଥ ହାତୀ ଗାଁ ପଞ୍ଚାୟତର ଚୋରଡିହୀ ଗ୍ରାମରେ ସାମାନ୍ୟ ବଚସାରୁ ଛୁରା ମାଡ଼ । ଏଥିରେ ଜଣେ ଯୁବକ ଗୁରୁତର ହୋଇ ମେଡିକାଲରେ ଭର୍ତ୍ତି ହୋଇଥିବା ଜଣାପଡିଛି । ଅନ୍ୟ ପକ୍ଷରେ ସ୍ଥାନୀୟ ପୋଲିସ ଅଭିଯୁକ୍ତଙ୍କୁ ଗିରଫ କରିବା ସହ କୋର୍ଟ ଚାଲାଣ କରିଛି ।

ସୂଚନାନୁଯାୟୀ, ଗତ ୭ ତାରିଖ ଦିନ ଚୋରଡିହୀ ଗ୍ରାମର ସୁକଦେବ ଗଣ୍ଡଙ୍କ ମକା ଜମିରେ ଶ୍ୟାମ ସିଂ ଗଣ୍ଡଙ୍କ ଗୋରୁ ପଶି ମକା ଗଛ ନଷ୍ଟ କରିଦେଇଥିଲ l ଏହାକୁ କେନ୍ଦ୍ର କରି ଦୁହିଁଙ୍କ ମଧ୍ୟରେ ପାଟି ତୁଣ୍ଡ ହୋଇଥିଲା । ପରଦିନ ଶ୍ୟାମ ସିଂ ଗଣ୍ଡ ରାଗିଯାଇ ସୁକଦେବ ଗଣ୍ଡଙ୍କ ଘରେ ପଶି ତୁଣ୍ଡ କରିଥିଲେ । ଧିରେ ଧିରେ ଉଭୟଙ୍କ ମଧ୍ୟରେ ଘଟଣାଟି ତିବ୍ର ରୂପ ନେଇଥିଲା । ଏହାପରେ ଶ୍ୟାମ ସିଂ ରାଗିଯାଇ ଏକ ଛୁରୀ ବାହାର କରି ସୁକଦେବଙ୍କ ଉପରେ ଆକ୍ରମଣ କରିଥିଲା ।

ଶ୍ୟାମ ସିଂ ଛୁରୀରେ ସୁକଦେବଙ୍କ ପେଟ ଓ ପିଠିକୁ ଆଘାତ କରିଥିଲେ । ନିକଟରେ ଉପସ୍ଥିତ ଥିବା ଲୋକେ ସୁକଦେବଙ୍କ ବଡଭାଇ ରୂପଦାସ ଗଣ୍ଡଙ୍କୁ ଖବର ଦେବାପରେ ଘଟଣାସ୍ଥଳରେ ସେ ପହଞ୍ଚି ଆହତ ସୁକଦେବଙ୍କୁ ସଙ୍ଗେ ସଙ୍ଗେ ରାଇଘର ମେଡିକାଲକୁ ନେଇଯାଇଥିଲେ । ସୁକଦେବଙ୍କ ଅବସ୍ଥା ଶୋଚନୀୟ ଥିବାରୁ ତାଙ୍କୁ ନବରଙ୍ଗପୁର ଜିଲ୍ଲା ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା । ଅପରପକ୍ଷରେ ସ୍ଥାନୀୟ ପୁଲିସ ଲିଖିତ ଅଭିଯୋଗ ପାଇ ତୁରନ୍ତ ଆହତ ସୁକଦେବଙ୍କୁ ଚିକିତ୍ସା ପାଇଁ ନବରଙ୍ଗପୁର କୁ ପଠାଇବା ସହ ଅଭିଯୁକ୍ତ ଶ୍ୟାମ ସିଂଙ୍କୁ ଗିରଫ କରି କୋର୍ଟ ଚାଲାଣ କରିଥିବା ଜଣାପଡ଼ିଛି।

ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ