ଜୁଆ ଖେଳକୁ ନେଇ ବାସନ୍ଦ, ଜିଲ୍ଲାପାଳଙ୍କୁ ଭେଟିଲେ 15 ପରିବାର

ନବରଙ୍ଗପୁର ଜିଲ୍ଲା କୋଡ଼ିଙ୍ଗା ଥାନା ଟେମରା ଗ୍ରାମ ପଞ୍ଚାୟତ ଅନ୍ତର୍ଗତ ଚୂରାହାଣ୍ଡି ଗ୍ରାମରେ 15 ପରିବାରକୁ ଗ୍ରାମରୁ ବାସନ୍ଦ କରିଥିବା ନେଇ କୋଡ଼ିଙ୍ଗା ତହସିଲଦାରଙ୍କୁ ଲିଖିତ ଅଭିଯୋଗ । ଅଧିକ ପଢନ୍ତୁ

ନବରଙ୍ଗପୁର:ଜୁଆ ଖେଳକୁ ନେଇ 15 ପରିବାରକୁ ଗ୍ରାମରୁ ବାସନ୍ଦ କରିଥିବା ଅଭିଯୋଗ । ଏହି ପନ୍ଦର ଗୋଟି ପରିବାର ନିମନ୍ତେ ଗ୍ରାମରେ ଦୋକାନରୁ ସଉଦା କିଣିବା, ଗ୍ରାମରେ ଥିବା ଅଙ୍ଗନବାଡ଼ି କେନ୍ଦ୍ରରେ ପିଲାମାନଙ୍କୁ ମନା କରାଯିବା, ପନିପରିବା କିଣିବା ଓ ଗାଈ ଗୋରୁ ଚରାଇବା ନିମନ୍ତେ ମଧ୍ୟ ମନା କରାଯାଇଥିବା ଭଳି ଅଭିଯୋଗ କରିଛନ୍ତି । ତେବେ ଏଭଳି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା କୋଡ଼ିଙ୍ଗା ଥାନା ଟେମରା ଗ୍ରାମ ପଞ୍ଚାୟତ ଅନ୍ତର୍ଗତ ଚୂରାହାଣ୍ଡି ଗ୍ରାମରେ । ଏନେଇ କୋଡ଼ିଙ୍ଗା ତହସିଲଦାରଙ୍କୁ ଲିଖିତ ଅଭିଯୋଗ କରିଛନ୍ତି ୧୫ ପରିବାର ।

ଅଭିଯୋଗ ଅନୁଯାୟୀ, ଗତ ମାର୍ଚ୍ଚ ୨୮ ତାରିଖରୁ ଖୁଡୁଖୁଡି ଖେଳ ଆରମ୍ଭ ହୋଇଥିଲା । ଆଉ ସେହି ଦିନ ଠାରୁ ପ୍ରତିଦିନ ଖେଳ ମଧ୍ୟ ଚାଲିଥିଲା । ହେଲେ କୌଣସି କାରଣ ବଶତଃ ଉକ୍ତ ଖେଳ ଏପ୍ରିଲ ୧୨ ତାରିଖରେ ବନ୍ଦ ହୋଇଯାଇଥିଲା । ଏହି ବିଷୟକୁ କେନ୍ଦ୍ର କରି ଗ୍ରାମର କିଛି ବ୍ୟକ୍ତି ବିଶେଷ ଇଶ୍ବର ହରିଜନ ଏବଂ ସଦାଶିବ ହରିଜନଙ୍କ ବିରୁଦ୍ଧରେ ଖୁଡୁଖୁଡି ଖେଳ ବନ୍ଦ କରିବା ନେଇ କୋଷାଗୁମୁଡ଼ା ଥାନାରେ ଏକ ଏତଲା ଦେଇଥିଲେ । ଏହାପରେ ଥାନାରେ ବୁଝାମଣା କରାଯାଇ ଚୁକ୍ତି ନାମା ଲେଖା ଯାଇଥିଲା ।

ହେଲେ ବର୍ତ୍ତମାନ ଗ୍ରାମର କିଛି ବ୍ୟକ୍ତି ମିଶି ଗ୍ରାମର ପ୍ରତ୍ୟେକ ପରିବାରକୁ ଶିଖାଇ ଏହି 15 ପରିବାରକୁ ଗାଁରୁ ବାସନ୍ଦ କରାଯାଇଥିବା ନେଇ ଅଭିଯୋଗ କରିଛନ୍ତି । ଗାଁ ଲୋକେ ଏହି 15 ପରିବାର ସହ ଅନ୍ୟ କୌଣସି କିଏ ସମ୍ପର୍କ ରଖିଲେ ସେମାନଙ୍କୁ ୫୦୦ ଟଙ୍କା ଜରିମାନା ଆଦାୟ କରିବାର ଆଦେଶ ଜାରି କରାଯାଇଛି । ସେହିପରି ବିବାହ, ଦଶାହ କାର୍ଯ୍ୟରେ ମଧ୍ୟ ସେମାନଙ୍କ ଘରକୁ କେହି ନ ଯେମିତି ନ ଯିବାକୁ ମନା କରାଯାଇଛି । ଯାହା ଦ୍ଵାରା 15 ପରିବାର ମାନସିକ ଆଶାନ୍ତିରେ ରହିବା ସହ ବହୁ କଷ୍ଟ ସହୁଥିବା ଏବଂ ସମାଜରେ ରହିବାକୁ ଅପମାନ ଲାଗୁଥିବା ଲିଖିତ ଅଭିଯୋଗ କରିଛନ୍ତି । ଏହା ସହିତ ଏହାର ସମାଧାନ ନିମନ୍ତେ ନବରଙ୍ଗପୁର ଜିଲ୍ଲାପାଳ ଓ ଆରକ୍ଷୀ ଅଧିକ୍ଷକଙ୍କ ଦ୍ବାରସ୍ଥ ହୋଇଛନ୍ତି ଏହି ବାସନ୍ଦ ପରିବାର ।

ଇଟିଭି ଭାରତ, ନବରଙ୍ଗପୁର