ମୟୁରଭଞ୍ଜ: ଟ୍ରେନ ଲାଇନ କ୍ରସ କରିବା ଯୁବକଙ୍କୁ ପଡିଲା ମହଙ୍ଗା । ବିଳମ୍ବିତ ରାତିରେ ଟ୍ରେନ ତଳେ ପଡିଯାଇ ଜଣେ ଯୁବକଙ୍କ ଦୁଇ ଗୋଡ କଟି ଯାଇଛି । ଗୁରୁତର ଅବସ୍ଥାରେ ତାଙ୍କୁ ବାରିପଦା ମେଡିକାଲରେ ଭର୍ତ୍ତି କରାଯାଇଛି। ପରେ ଖବର ପାଇ ଯୁବକଙ୍କ ପରିବାର ଲୋକ ସେଠାରେ ପହଞ୍ଚି କ୍ଷତିପୂରଣ ଦାବି କରିଥିବା ଜଣାପଡିଛି ।
ସୂଚନାନୁସାରେ ମୟୁରଭଞ୍ଜ ଜିଲ୍ଲା ବାରିପଦା ଟାଉନ ଥାନା ଅଧିନସ୍ଥ ଭୁଗୁଡ଼ାକଟା ଗ୍ରାମର ଚିତ୍ତରଞ୍ଜନ ହାତୀଙ୍କ ଟ୍ରେନରେ ଦୁଇ ଗୋଡ କଟି ଯାଇଛି । ଗତକାଲି ବିଳମ୍ବିତ ରାତିରେ ଅତ୍ୟଧିକ ନିଶା ସେବନ କରି ସେ ଟ୍ରେନ ଲାଇନ କ୍ରସ କରୁଥିଲେ । ହେଲେ ସେତିକି ବେଳେ ବାରିପଦାରୁ ରୂପସା ଯାଉଥିବା ଡିଏମୟୁ ଟ୍ରେନ ତଳେ ଯୁବକ ଜଣକ ପଡି ଯାଇଥିଲେ । ଫଳରେ ତାଙ୍କର ଦୁଇ ଗୋଡ କଟି ଯାଇଛି। ତେବେ ଘଟଣା ସ୍ଥଳରେ ଜିଆରପି ପୋଲିସ ପହଞ୍ଚି ଯୁବକଙ୍କୁ ଗୁରୁତର ଅବସ୍ଥାରେ ଉଦ୍ଧାର କରି ବାରିପଦା ପିଆରଏମ ମେଡିକାଲ କଲେଜରେ ଚିକିତ୍ସା ପାଇଁ ଭର୍ତ୍ତି କରିଛି।
ମୟୁରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
