ରାଗରେ ହରାଇଲେ ନିୟନ୍ତ୍ରଣ, ପ୍ରେମିକାକୁ କଚାଡି ମାରିଲା ପ୍ରେମିକ

ପ୍ରେମିକାକୁ କଚାଡି ମାରିଲା ପ୍ରେମିକ । ମୟୂରଭଞ୍ଜ ଜିଲ୍ଲା ମୋରଡ଼ା ଥାନା ପିସିପୁର ଭଦ୍ରାଷୋଳ ଗ୍ରାମରେ ଏଭଳି ଏକ ଅଭାବନୀୟ ଘଟଣା ଘଟିଛି । ଅଧିକ ପଢ଼ନ୍ତୁ

ବାରିପଦା:ପ୍ରେମିକାକୁ କଚାଡି ମାରିଲା ପ୍ରେମିକ । ମୟୂରଭଞ୍ଜ ଜିଲ୍ଲା ମୋରଡ଼ା ଥାନା ପିସିପୁର ଭଦ୍ରାଷୋଳ ଗ୍ରାମରେ ଏଭଳି ଏକ ଅଭାବନୀୟ ଘଟଣା ଘଟିଛି । ପ୍ରେମିକାକୁ ହତ୍ୟା କରି ମୃତଦେହକୁ ନିକଟସ୍ଥ ଜଙ୍ଗଲରେ ଲୁଚାଇ ରଖିଥିଲା । ଖବର ପାଇ ଘଟଣାସ୍ଥଳରେ ମୋରଡା ଥାନା ପୋଲିସ ପହଞ୍ଚି ମୃତଦେହ ଉଦ୍ଧାର କରିବା ସହ ଅଭିଯୁକ୍ତକୁ ଗିରଫ କରିଛି ।

ସୂଚନା ଅନୁଯାୟୀ, ଗ୍ରାମର ଦେବାନ ଭକ୍ତାଙ୍କ ଝିଅ ଯାତ୍ରୀ ଭକ୍ତାଙ୍କ ସହ ଉକ୍ତ ଗ୍ରାମର ଯୁବକ ଚାମଟୁ ନାଏକଙ୍କ ପୁଅ ଟିପୁନ ନାଏକ ତିନି ବର୍ଷ ହେବ ପ୍ରେମ ସମ୍ପର୍କରେ ଥିଲେ । ଗତ ମଙ୍ଗଳବାର ସନ୍ଧ୍ୟାରେ ଦୁହେଁ ଏକତ୍ରିତ ବସି କଥା ହେଉଥିବା ବେଳେ ହଠାତ୍‌ କୌଣସି କାରଣକୁ ନେଇ ଟିପୁନ ଉତ୍ତ୍ୟକ୍ତ ହୋଇ ଯାତ୍ରୀଙ୍କୁ ମାଡ଼ ମାରିଥିଲା । ତେବେ ସେତିକିରେ ରାଗ ଶାନ୍ତ ପଡିନଥିଲା । ଶେଷରେ ଯାତ୍ରୀଙ୍କୁ ଉଠାଇ କଚାଡି ଜୀବନରୁ ମାରିଦେଇଥିଲା । ଏହାପରେ ମୃତଦେହକୁ ନିକଟସ୍ଥ ଜଙ୍ଗଲରେ ଲୁଚାଇଦେଇଥିଲା । ତେବେ ଏହି ସମ୍ପର୍କରେ ମୋରଡା ଥାନା ଅଧିକାରୀ ଖବର ପାଇ ଘଟଣା ସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିଥିଲେ । ବାରିପଦାରୁ ସାଇଣ୍ଟିଫିକ ଟିମ ଆସି ମଧ୍ୟ ତଦନ୍ତ କରିଛି । ଏହି ଘଟଣାରେ ପୋଲିସ ଅଭିଯୁକ୍ତକୁ ଗିରଫ କରିଛି । ଘଟଣାର ତଦନ୍ତ ଜାରି ରହିଥିବାବେଳେ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବାରିପଦା ସ୍ଥିତ ମେଡ଼ିକାଲକୁ ପଠାଯାଇଛି । ଏନେଇ ୨୨୯/୨୨ ରେ ଏକ ମାମଲା ରୁଜୁ କରାଯାଇଥିବା ଜଣାପଡିଛି ।

ଇଟିଭି ଭାରତ, ମୟୂରଭଞ୍ଜ