ଦ୍ୱାରଶୁଣି ଘାଟିରେ ଟ୍ରକ୍ ସହ ପିଟି ହେଲା ଟ୍ରକ୍, ଲାଗିଲା ନିଆଁ

ମୟୂରଭଞ୍ଜ ଜିଲ୍ଲା ବାଙ୍ଗରିପୋଷି ଥାନା ଅଞ୍ଚଳର ଦ୍ୱାରଶୁଣି ଘାଟିରେ ଦୁଇଟି ଟ୍ରକ ପଛକୁ ପଛ ପିଟି ହୋଇ ଦୁର୍ଘଟଣା ଘଟିଛି । ଦୁର୍ଘଟଣା ପରେ ଟ୍ରକରେ ନିଆଁ ଲାଗିଯାଇଛି । ଘଟଣାସ୍ଥଳରେ ପୋଲିସ ଓ ଦମକଳ ବାହିନୀ ପହଞ୍ଚି ନିଆଁକୁ ଲିଭାଇଛନ୍ତି ।

ବାରିପଦା: ବାଙ୍ଗରିପୋଷି ଦ୍ୱାରଶୁଣି ଘାଟିରେ ଟ୍ରକ ଦୁର୍ଘଟଣା, ଦୁର୍ଘଟଣା ପରେ ଟ୍ରକରେ ଲାଗିଲା ନିଆଁ । ଦୁଇଟି ଟ୍ରକ ପଛକୁ ପଛ ପିଟି ହୋଇ ଦୁର୍ଘଟଣାଗ୍ରସ୍ତ ହୋଇଛି । ଖବର ପାଇ ବାଙ୍ଗରିପୋଷି ପୁଲିସ ଓ ଦମକଳ ବାହିନୀ ଘଟଣାସ୍ଥଳରେ ପହଞ୍ଚି ଦୀର୍ଘ ସମୟ ପ୍ରଚେଷ୍ଟା ପରେ ନିଆଁକୁ ଆୟତ୍ତ କରିଛନ୍ତି । ତେବେ ଜଣେ ଚାଳକ ଫେରାର ଥିବାବେଳେ,ଅନ୍ୟ ଜଣେ ସାମାନ୍ୟ ଆହତ ହେଇଥିବା ସୂଚନା ମିଳିଛି ।

ମୟୂରଭଞ୍ଜ ଜିଲ୍ଲା ବାଙ୍ଗରିପୋଷି ଦେଇ ଯାଇଥିବା 49 ନମ୍ବର ଜାତୀୟ ରାଜପଥର ଦ୍ୱାରଶୁଣି ଘାଟିରେ ପୁଣି ଦୁର୍ଘଟଣା ଘଟିଛି । ରବିବାର ସକାଳୁ ଦୁଇଟି ଟ୍ରକ ଦୁର୍ଘଟଣା ହେବା ଫଳରେ ଗୋଟିଏ ଟ୍ରକରେ ନିଆଁ ଲାଗି ଯାଇଥିଲା । ଟ୍ରକ ଦୁଇଟି ପଛକୁ ପଛ ପିଟି ହୋଇ ଦୁର୍ଘଟଣା ଗ୍ରସ୍ତ ହୋଇଛି। ଉଭୟ ଟ୍ରକ ଘାଟିରୁ ତଳକୁ ଓହ୍ଲାଉ ଥିବାବେଳେ ଦୁର୍ଘଟଣା ଘଟିଛି । ଏହି ଘାଟିରେ ଗତ ଜାନୁଆରୀ ମାସରୁ ଦୁର୍ଘଟଣା ଘଟି ଆଜି ପର୍ଯ୍ୟନ୍ତ ଅନେକ ମୃତ୍ୟୁ ହେବା ସହିତ ଆହତ ହୋଇଛନ୍ତି ।

ପ୍ରଶାସନ ଯେତେ ଚେଷ୍ଟା କଲେ ମଧ୍ୟ ଦୁର୍ଘଟଣା ରୋକିବାରେ ବିଫଳ ହୋଇଛି । ଶିମିଳିପାଳ କୋର ଏରିଆ ଓ ହାତୀ କୋରିଡର ପାଇଁ ରାସ୍ତା ସଂପ୍ରସାରଣ କାର୍ଯ୍ୟ ହୋଇପାରୁନାହିଁ। କେନ୍ଦ୍ର ସରକାରଙ୍କ ଜଙ୍ଗଲ ଓ ପରିବେଶ ମନ୍ତ୍ରଣାଳୟ ଚାହିଁଲେ ଏହି ସମସ୍ୟା ଦୂରୀଭୂତ ହେବ ବୋଲି ସାଧାରଣରେ ଚର୍ଚ୍ଚା ଚାଲିଛି ।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ