ପିଉସୀ ଘରକୁ ଯିବା ପାଇଁ କାହାରିକୁ ନଜଣାଇ ଟ୍ରେନରେ ବାହାରି ଥିଲେ ଦୁଇ ନାବାଳକ, ଉଦ୍ଧାର କଲା ପୋଲିସ

ଟାଟା-ବାଦାମପାହାଡ ଟ୍ରେନରୁ ଦୁଇ ନାବାଳକ ଛାତ୍ର ଉଦ୍ଧାର । ଜଣେ ଆଠ ବର୍ଷ ଓ ଅନ୍ୟ ଜଣେ ଦଶ ବର୍ଷର ଛାତ୍ରଙ୍କୁ ଉଦ୍ଧାର କଲା ପୋଲିସ । ଅଧିକ ପଢ଼ନ୍ତୁ

ରାଇରଙ୍ଗପୁର: ଟ୍ରେନରୁ ଉଦ୍ଧାର ହେଲେ ଦୁଇ ନାବାଳକ ଛାତ୍ର । ମୟୂରଭଞ୍ଜ ଜିଲ୍ଲା ତିରିଂ ଥାନା ଅନ୍ତର୍ଗତ ବହଳଦା ରୋଡ ରେଳ ଷ୍ଟେସନରୁ ଟାଟା-ବାଦାମପାହାଡ ଟ୍ରେନରୁ ଦୁଇ ନାବାଳକ ଉଦ୍ଧାର କଲା ପୋଲିସ । ସମ୍ପର୍କୀୟଙ୍କ ଘରକୁ ଯିବା ଉଦ୍ଦେଶ୍ୟରେ ବସିଥିବା ଦୁଇ ଆଦିବାସୀ ନାବାଳକଙ୍କୁ ଉଦ୍ଧାର କରିଛି ଝରାଡିହି ଫାଣ୍ଡି ପୋଲିସ । ତେବେ ଜଣେ ନାବାଳକକୁ ଆଠ ବର୍ଷ ଓ ଅନ୍ୟ ଜଣେ ଦଶ ବର୍ଷର ହୋଇଥିବା ସୂଚନା ରହିଛି ।

ସୂଚନା ଅନୁସାରେ, ନାବାଳକ ଦୁଇ ଜଣ ମୟୂରଭଞ୍ଜ ଜିଲ୍ଲା ଯଶିପୁର ଥାନା ଅନ୍ତର୍ଗତ ଉସ୍କି ଆଶ୍ରମ ସ୍କୁଲର ଛାତ୍ର । ତେବେ ସ୍କୁଲରେ କାହାରିକୁ କିଛି ନ ଜଣାଇ ଟାଟା ନଗରସ୍ଥିତ ପିଉସି ଘରକୁ ଯିବା ଉଦ୍ଦେଶ୍ୟରେ ବାଦାମପାହାଡ ପହଞ୍ଚିଥିଲେ । ପରେ ବାଦାମପାହାଡ ଷ୍ଟେସନ ଯାଇ ସେଠାରୁ ଟାଟା-ବାଦାମପାହାଡ ପାସେଞ୍ଜର ଟ୍ରେନରେ ଚଢି ଯାଇଥିଲେ । ତେବେ ଆଶ୍ରମ ସ୍କୁଲରେ ଉକ୍ତ ଛାତ୍ର ଦୁଇ ଜଣ ନଥିବାରୁ ସ୍କୁଲ କର୍ତ୍ତୃପକ୍ଷଙ୍କ ତରଫରୁ ଉକ୍ତ ନାବାଳକଙ୍କୁ ଖୋଜାଖୋଜି ଆରମ୍ଭ କରାଯାଇଥିଲା । କିଛି ପ୍ରତ୍ୟକ୍ଷଦର୍ଶୀଙ୍କ ଠାରୁ ଟ୍ରେନରେ ଦୁଇ ଜଣ ଛାତ୍ର ଚଢିଥିବା ଜଣା ପଡ଼ିବା ପରେ ପ୍ରଥମେ ରାଇରଙ୍ଗପୁର ରେଳ ଷ୍ଟେସନ ଓ ପରେ ବହଳଦାରୋଡ ଷ୍ଟେସନକୁ ଖବର ଦିଆଯାଇଥିଲା । ବହଳଦାରୋଡ ଷ୍ଟେସନ ମାଷ୍ଟରଙ୍କ ତତ୍ତ୍ବାବଧାନରେ ରେଳ କର୍ମଚାରୀମାନେ ନାବାଳକ ଦୁଇଜଣଙ୍କୁ ଉଦ୍ଧାର କରି ଷ୍ଟେସନରେ ରଖିଥିଲେ ।

ଖବର ପାଇବା ପରେ ଉସ୍କି ଆଶ୍ରମ ସ୍କୁଲର ପ୍ରଧାନ ଶିକ୍ଷକ ଦୁଇ ଜଣ ସହକାରୀ ଶିକ୍ଷକଙ୍କ ସହିତ ଝରାଡିହି ଫାଣ୍ଡି ପହଞ୍ଚି ଉକ୍ତ ନାବାଳକ ଛାତ୍ର ଦୁଇ ଜଣଙ୍କୁ ନିଜ ହେପାଜତରେ ନେଇଛନ୍ତି । ତେବେ ନାବାଳକ ଛାତ୍ର ଦୁଇଜଣ ହେଲେ ଯଶିପୁର ଥାନା ଅନ୍ତର୍ଗତ ଶିମିଳିପାଳ ଅଞ୍ଚଳର ଗୁଡରା ଗ୍ରାମ କୋଚା ସାହିର ବିନୋଦ ହେମ୍ବ୍ରମଙ୍କ ପୁଅ ଘାସିଆ ହେମ୍ବ୍ରମ ଓ ମାରାଂ ସାହିର ସ୍ବର୍ଗତ ସୁରଜ ହେମ୍ବ୍ରମଙ୍କ ପୁଅ ଠାକୁରା ହେମ୍ବ୍ରମ । ସେପଟେ ଆଶ୍ରମ ସ୍କୁଲର ଛାତ୍ର ଦ୍ବୟ କାହାକୁ କିଛି ନ ଜଣାଇ କିପରି ସ୍କୁଲ ବାହାରକୁ ଯାଇ ପାରିଲେ ଯାହାକି ଆଶ୍ରମ ସ୍କୁଲ କର୍ତ୍ତୃପକ୍ଷଙ୍କ ଦାୟିତ୍ବହୀନତାକୁ ପଦାରେ ପକାଇଛି ।

ଇଟିଭି ଭାରତ, ରାଇରଙ୍ଗପୁର