ରାଇରଙ୍ଗପୁର : ଡମ୍ଫର ଧକ୍କାରେ ପ୍ରଥମ ଶ୍ରେଣୀ ସ୍କୁଲ ଛାତ୍ରୀଙ୍କ ମୃତ୍ୟୁ । ଏପରି ଏକ ଦୁଃଖଦ ଘଟଣା ଘଟିଛି ମୟୂରଭଞ୍ଜ ଜିଲ୍ଲା ବାଦାମପାହାଡ଼ ଥାନା ଅଧୀନ ବାଦାମପାହାଡ ଅଞ୍ଚଳରେ ।
ସୂଚନା ଅନୁଯାୟୀ, ବାଦାମପାହାଡ ସରସ୍ଵତୀ ଶିଶୁ ବିଦ୍ୟା ମନ୍ଦିରରେ ପ୍ରଥମ ଶ୍ରେଣୀରେ ପଢୁଥିବା ଚାରି ବର୍ଷର ଶିଶୁକନ୍ୟା ଆରତୀ ବଦ୍ରା ସ୍କୁଲ ଛୁଟି ପରେ ସମ୍ପର୍କୀୟ କକାଙ୍କ ସହିତ ବାଇକ ଯୋଗେ ଘରକୁ ଫେରୁଥିଲେ । ତେବେ ବାଇକରେ ମୃତ ଶିଶୁର ସମ୍ପର୍କୀୟ କକାଙ୍କ ସହ ସ୍କୁଲର ଅନ୍ୟ ଦୁଇଜଣ ଶିଶୁ ମଧ୍ୟ ଥିଲେ ।
ସେହି ସମୟରେ ଏକ ଆଇରନ ବୋଝେଇ ଟ୍ରକ ତାଙ୍କୁ ଧକ୍କା ଦେଇଥିଲା । ଫଳରେ ଡମ୍ଫରଟି ଆରତୀଙ୍କ ମୁଣ୍ଡ ଉପରେ ଚଢି ଯାଇଥିଲା । ଘଟଣାସ୍ଥଳରେ ହିଁ ଶିଶୁ କନ୍ୟାର ପ୍ରାଣବାୟୁ ଉଡି ଯାଇଥିଲା । ମାତ୍ର ଅନ୍ୟ ଦୁଇ ଶିଶୁଙ୍କ ସମେତ ଆରତୀଙ୍କ କକା ଅଳ୍ପକେ ବର୍ତ୍ତି ଯାଇଥିଲେ । ଏନେଇ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇ ଡମ୍ଫର ଚାଳକକୁ ନିର୍ଦ୍ଧୁମ ମାଡ ମାରି ଲହୁ ଲୁହାଣ କରି ଦେଇଥିଲେ ।
ଏହାସହ ପୋଲିସ ଓ ଆମ୍ବୁଲାନ୍ସ ଆସିବାରୁ ଉତ୍ତ୍ୟକ୍ତ ଲୋକେ ରାସ୍ତା ଅବରୋଧ କରି ସେମାନଙ୍କୁ ପାଖକୁ ଆସିବାକୁ ଦେଇନଥିଲେ । ଫଳରେ ଘଟଣାସ୍ଥଳରେ ଚାପା ଉତ୍ତେଜନା ଲାଗି ରହିଥିଲା । ଏହାସହ ସ୍ଥାନୀୟ ଲୋକେ ଉତ୍ତ୍ୟକ୍ତ ହୋଇ ବାଦାମ ପାହାଡରେ ଥିବା ଆଇରନ କମ୍ପାନୀ ଲାଲ ଟ୍ରେଡର୍ସ ଏଜେନ୍ସିର କାର୍ଯ୍ୟାଳୟକୁ ଘେରାଉ କରି ଭଙ୍ଗାରୁଜା କରିଛନ୍ତି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
