ରାଇରଙ୍ଗପୁର: ଦୁଆରଶୁଣୀ ଘାଟିରେ ଘଟିଲା ସଡ଼କ ଦୁର୍ଘଟଣା । ବ୍ରେକ୍ ଫେଲ୍ ହେବାରୁ ଏକ ପୋଲିସ ଭ୍ୟାନ୍ ଦୁର୍ଘଟଣାଗ୍ରସ୍ତ ହୋଇଛି । ଏଥିରେ ୧୦ରୁ ଊର୍ଦ୍ଧ୍ୱ ପୋଲିସ କର୍ମଚାରୀ ଆହତ ହୋଇଥିବା ଖବର ସାମ୍ନାକୁ ଆସିଛି । ମଙ୍ଗଳବାର ୫ଟି ଅଧ୍ୟକ୍ଷ ଭି. କେ. ପାଣ୍ଡିଆନଙ୍କ ବାରିପଦା ଗସ୍ତ କାର୍ଯ୍ୟକ୍ରମ ରହିଛି । ତେଣୁ ସୁରକ୍ଷା ପାଇଁ ସେଠାରେ ଡ୍ୟୁଟିରେ ଯୋଗ ଦେବା ପାଇଁ ପୋଲିସ କର୍ମଚାରୀମାନେ ଏକ ଭ୍ୟାନ୍ ଯୋଗେ କରଞ୍ଜିଆ ସହରରୁ ବାରିପଦା ସହର ଅଭିମୁଖେ ଆସୁଥିଲେ ।
ତେବେ ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଥାନା ଅନ୍ତର୍ଗତ ଦୁଆରଶୁଣୀ ଘାଟି ରାସ୍ତା ଦେଇ ପୋଲିସ ଭ୍ୟାନ୍ଟି ଆସୁଥିବା ବେଳେ ଘାଟି ରାସ୍ତାରେ ଭ୍ୟାନର ବ୍ରେକ ଫେଲ୍ ହୋଇଯାଇଥିଲା । ଫଳରେ ଗଡାଣିଆ ରାସ୍ତା ଥିବାରୁ ପୋଲିସ ଭ୍ୟାନ୍ ଓ ବିପରୀତ ଦିଗରୁ ଆସୁଥିବା ଗୋଟିଏ କଣ୍ଟେନର ସହିତ ମୁଁହାମୁହିଁ ଧକ୍କା ହୋଇଥିଲା । ଫଳରେ ପୋଲିସ ଭ୍ୟାନରେ ଥିବା ପୋଲିସ କର୍ମଚାରୀଙ୍କ ମଧ୍ୟରୁ ୧୦ ଜଣରୁ ଊର୍ଦ୍ଧ୍ୱ କର୍ମଚାରୀ ଆହତ ହୋଇଥିବା ସୂଚନା ମିଳିଛି ।
ଦୁର୍ଘଟଣା ପରେ ସ୍ଥାନୀୟ ପୋଲିସ ଓ ଆମ୍ବୁଲାନ୍ସକୁ ଖବର ଦିଆ ଯାଇଥିଲା । ସମସ୍ତ ଆହତ ପୋଲିସ କର୍ମଚାରୀଙ୍କୁ ଉଦ୍ଧାର କରାଯାଇ ୧୦୮ ଆମ୍ବୁଲାନ୍ସ ଯୋଗେ ବାଙ୍ଗିରିପୋଷି ମେଡିକାଲକୁ ଅଣା ଯାଇଥିଲା । ସେଠାରେ ସମସ୍ତଙ୍କର ପ୍ରାଥମିକ ଚିକିତ୍ସା ପରେ ବାରିପଦା ସ୍ଥିତ ପିଆରଏମ ମେଡ଼ିକାଲ କଲେଜ ଆଣ୍ଡ୍ ହସ୍ପିଟାଲକୁ ସ୍ଥାନାନ୍ତରିତ କରାଯାଇଛି । ଏହି ଦୁର୍ଘଟଣାରେ ଜଣେ ପୋଲିସ କର୍ମଚାରୀ ଗୁରୁତର ଭାବେ ଆହତ ହୋଇଥିବା ଖବର ମିଳିଛି ।
ଏହା ମଧ୍ୟ ପଢନ୍ତୁ...କ୍ଷୀର ଆଣିବାକୁ ଯାଇଥିଲେ, ଜୀବନ ନେଲା ପଥର ବୋଝେଇ ଟ୍ରକ