ଖୋଲିଲା ପିଥ ମୁର୍ମୁ ହତ୍ୟା ଗୁମର, 5 ଅଭିଯୁକ୍ତ ଗିରଫ

ରାଇରଙ୍ଗପୁରର ଚର୍ଚ୍ଚିତ ପିଥ ମୁର୍ମୁ ହତ୍ୟା ଘଟଣାରେ ପୋଲିସ 5 ଅଭିଯୁକ୍ତଙ୍କୁ ଗିରଫ କରିଛି । ସେମାନଙ୍କ ଠାରୁ ହତ୍ୟାରେ ବ୍ୟବହୃତ ମାରଣାସ୍ତ୍ର ଜବତ କରାଯାଇଛି । ଏହା ଏକ ପ୍ରେମ ଜନିତ ସୁପରିକଳ୍ପିତ ହତ୍ୟାକାଣ୍ଡ ବୋଲି ପୋଲିସ ସ୍ପଷ୍ଟ କରିଛି ।

ରାଇରଙ୍ଗପୁର: ଚର୍ଚ୍ଚିତ ପିଥ ମୁର୍ମୁ ହତ୍ୟା ଘଟଣାରେ 5 ଅଭିଯୁକ୍ତ ଗିରଫ । ଗିରଫ ଅଭିଯୁକ୍ତ ହେଲେ ଦେଉଳି ଗାଁର ମହିଳା ମାନକୋ ମାରାଣ୍ଡି(୩୬),ବନ୍ତଳି ଗାଁର ଚାନ୍ଦୁ ମୁର୍ମୁ(୩୨), ଅସନା ଗାଁ ରାମଦାସ ମୁର୍ମୁ(୨୮), ଜଗନ୍ନାଥ ଲୋହାର(୨୯) ଓ ଏଦେଲବେଡା ଗାଁର ପାନ ମୁର୍ମୁ(୨୨)। ଅଭିଯୁକ୍ତଙ୍କ ନିକଟରୁ ହତ୍ୟାରେ ବ୍ୟବହୃତ ଲୁହାରୋଡ ଓ ଦୁଇଟି ବାଇକ, ୬ଟି ମୋବାଇଲ, ନଗଦ ୯୫୨୦ ଟଙ୍କା ଜବତ କରିଛି ପୋଲିସ । ଗିରଫ ପରେ ସମସ୍ତଙ୍କୁ କୋର୍ଟ ଚାଲାଣ କରାଯାଇଛି ।

ସୂଚନା ଅନୁଯାୟୀ ଗତ ୨୩ ତାରିଖରେ ମୟୁରଭଞ୍ଜ ଜିଲ୍ଲା ବହଳଦା ଥାନା ଏଦେଲବେଡା ଗାଁ ନିକଟରୁ ଜଣେ ଯୁବକଙ୍କ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର କରାଯାଇଥିଲା । ଘଟଣାର ତଦନ୍ତ ପରେ ମୃତକ ଅସନବଣୀ ଗାଁର ପିଥ ମୁର୍ମୁ ବୋଲି ଜଣାପଡିଥିଲା । ଘଟଣାର ଛାନଭିନ ପରେ ଶେଷରେ ଅଭିଯୁକ୍ତଙ୍କୁ ଧରିବାରେ ସଫଳ ହୋଇଛି ପୋଲିସ ।

ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ