ବାରିପଦା: ବାତ୍ୟା 'ଅମ୍ପାନ' ପ୍ରଭାବରେ କ୍ଷତିଗ୍ରସ୍ତ ମୟୂରଭଞ୍ଜ ଜିଲ୍ଲାର ବିଭିନ୍ନ ନିର୍ବାଚନମଣ୍ଡଳୀ ଗସ୍ତ କରିଛନ୍ତି ମୟୂରଭଞ୍ଜ ଜିଲ୍ଲା ପର୍ଯ୍ୟବେକ୍ଷକ ତଥା ରାଜ୍ୟ ବିଜେଡି ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ । ଗୁରୁବାର ଗସ୍ତ ସମୟରେ ସେ ବିଜେଡି କର୍ମୀଙ୍କୁ ନିଜ ନିଜ ନିର୍ବାଚନ ମଣ୍ଡଳୀରେ କୋରୋନା ସହ ବାତ୍ୟା ଅମ୍ପାନରେ ପ୍ରଭାବିତ ଲୋକଙ୍କ ନିକଟରେ ପହଞ୍ଚି ସୁଖ ଦୁଃଖରେ ସାମିଲ ହେବା ପାଇଁ କହିଥିଲେ ।
ସେହିପରି କୋରୋନା ପାଇଁ ଦଳୀୟ ମିଟିଂ ବନ୍ଦ ଥିବାରୁ ମୟୂରଭଞ୍ଜ ଜିଲ୍ଲାରେ ବିଜେଡି ସଂଗଠନକୁ ଦୃଢ଼ କରିବା ପାଇଁ ପ୍ରଣବ ମୟୂରଭଞ୍ଜ ଜିଲ୍ଲା କପ୍ତିପଦା, ଜି ବି ନଗର, ବଡ଼ସାହି, ମୋରଡ଼ା, ରାସଗୋବିନ୍ଦପୁରରେ ବିଜେଡି କର୍ମୀଙ୍କ ସହ ଆଲୋଚନା କରିଥିଲେ । ମୋରଡ଼ା ଠାରେ ଅନୁଷ୍ଠିତ ବିଜେଡି କର୍ମୀ ବୈଠକରେ ତାଙ୍କ ସହ ପୂର୍ବତନ ଉପବାଚସ୍ପତି ସାନନ୍ଦ ମାର୍ଣ୍ଡି, କୃଷି ନିଗମ ଅଧ୍ୟକ୍ଷ ଦେବାଶିଷ ମହାନ୍ତି, ବିଜେଡି ନେତା ଦେବାଶିଷ ମାର୍ଣ୍ଡି, ମୋରଡ଼ା ବିଧାୟକ ରାଜକିଶୋର ଦାସ, ରାଜ୍ୟସଭା ସାଂସଦ ମମତା ମହାନ୍ତ ପ୍ରମୁଖ ଉପସ୍ଥିତ ଥିଲେ ।
ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ
