ଆବାସ ଯୋଜନାରେ ଅଯୋଗ୍ୟ ପ୍ରକୃତ ହିତାଧିକାରୀ, ଲାଞ୍ଚ ନଦେବାରୁ ବ୍ଲାକ୍ ଲିଷ୍ଟରେ ନାମ

ଗରୀବ ଶ୍ରେଣୀର ଲୋକଙ୍କ ପାଇଁ ସରକାର କରୁଛନ୍ତି ଅନେକ ଯୋଜନା । ହେଲେ ସେହି ସବୁ ଯୋଜନା ଯୋଗ୍ୟ ହିତାଧୀକାରୀଙ୍କ ନିକଟରେ ପହଞ୍ଚିପାରୁନାହିଁ । ଯାହା ଫଳରେ ଅତୀ ଦୟନୀୟ ଅବସ୍ଥାରେ ଭଙ୍ଗା ଦଦରା ଘରେ ରହି ଦିନ କାଟୁଛନ୍ତି ।

ରାଇରଙ୍ଗପୁର: ରହିବାକୁ ନାହିଁ ଖଣ୍ଡିଏ ପକ୍କା ଘର । ଖରା, ବର୍ଷା ଓ ଶୀତରେ ଭଙ୍ଗା ଘରେ ବିତୁଛି ଜୀବନ । ବର୍ଷା ଦିନରେ ଘରେ ପାଣି ଗଳୁଥିବା ବେଳେ, ଘରର ଅବସ୍ଥା ନ କହିବା ଭଲ । ପ୍ରଶାସନର ଖାମଖିଆଲି ଓ ଦୁର୍ନୀତିଖୋର ମନୋଭାବ ଯୋଗୁଁ ପ୍ରକୃତ ହିତାଧିକାରୀ ସରକାରୀ ଯୋଜନାରୁ ବଞ୍ଚିତ ହେଉଛନ୍ତି । ମୟୂରଭଞ୍ଜ ଜିଲ୍ଲା ବହଳଦା ବ୍ଲକ ବଡପଳସା ଗାଁର ହିତାଧୀକାରୀଙ୍କ କଥା । ଯେଉଁଠି ଲାଞ୍ଚ ନ ଦେଲେ ଯୋଗ୍ୟ ହିତାଧିକାରୀଙ୍କୁ ମିଳୁନି ପ୍ରଧାନମନ୍ତ୍ରୀ ଆବାସ ଯୋଜନାରେ ଖଣ୍ଡିଏ ପକ୍କା ଘର । ବଡପଳସା ଗାଁର ୩୦ ରୁ ଊର୍ଦ୍ଧ୍ବ ଲୋକେ ଘର ଖଣ୍ଡିଏ ପାଇବାରୁ ବଞ୍ଚିତ ହୋଇଛନ୍ତି । ଆସନ୍ତୁ ଦେଖିବା ବହଳଦା ବ୍ଲକ ବଡପଳସା ଗ୍ରାମରୁ ଇଟିଭି ଭାରତର ଏହି ସ୍ବତନ୍ତ୍ର ରିପୋର୍ଟ ।

ବଡପଳସା ଗାଁର ଶିବ ଶଙ୍କର ମଣ୍ଡଳଙ୍କ ଠାରୁ 2019 ମସିହାରେ ଆବଶ୍ୟକୀୟ କାଗଜ ପତ୍ର ନେଇ ଆବାସ ଯୋଜନାରେ ଗୃହ ଯୋଗାଇ ଦେବା ପାଇଁ 10 ହଜାର ଟଙ୍କା ଲାଞ୍ଚ ଦାବି କରିଥିଲେ ପିଇଓ ଓ ଜିଆରଏସ । ମଣ୍ଡଳ ବାର୍ଦ୍ଧକ୍ୟ ଭତ୍ତାରେ ଚଳୁଥିବା ଜଣେ ଅତ୍ୟନ୍ତ ଗରିବ ବ୍ୟକ୍ତି ହୋଇଥିବାରୁ ଲାଞ୍ଚ ଟଙ୍କା ଦେଇ ନ ପାରିବାରୁ ଦୁଇ ମହଲା କୋଠାଘର ଥିବା ଦର୍ଶାଇ ତାଙ୍କୁ କଳା ତାଲିକାଭୁକ୍ତ କରାଯିବା ସହ ଆବାସ ଗୃହକୁ ତାଲିକାରୁ କାଟି ଦେଇଥିବା ନେଇ ଅଭିଯୋଗ କରିଛନ୍ତି ଶିବ ।

ଏନେଇ ସେ ଜିଲ୍ଲାପାଳ, ଭିଜିଲାନ୍ସ ମନିଟରିଂ କମିଟି ନିକଟରେ ଏକ ଅଭିଯୋଗ ପତ୍ର ଦାଖଲ କରିଥିଲେ । ବାସଗୃହ ପାଇବା ପାଇଁ ଯୋଗ୍ୟ ହିତାଧିକାରୀ ମାନେ ମଧ୍ୟ ବର୍ଷା ଖରାରେ ଭଙ୍ଗା ଘର ଉପରେ ପଲିଥିନ ଦେଇ ରହୁଥିବା ବେଳେ ଲାଞ୍ଚ ଦେଇ ନ ପାରି ଚାହିଁ ବସିଛନ୍ତି ଆବାସ ଗୃହକୁ । ଏହାର ତଦନ୍ତ କରି ପ୍ରକୃତ ହିତାଧିକାରୀଙ୍କୁ ବାସଗୃହ ଯୋଗାଇଦେବା ସହିତ ଦୁର୍ନୀତିଗ୍ରସ୍ତ ଅଧିକାରୀଙ୍କ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବି ହେଉଛି ।

ଏଥିରୁ ସ୍ପଷ୍ଟ ବାରି ହେଉଛି ଯେ, ସରପଞ୍ଚ, ଜିଆରଏସ ଓ ପିଇଓଙ୍କ ହୀନ ଚକ୍ରାନ୍ତରେ ଅନୈତିକ ଭାବେ ଭୂଲ ରିପୋର୍ଟ ପ୍ରଦାନ କରାଯାଇ ଯୋଗ୍ୟ ହିତାଧିକାରୀଙ୍କୁ ଆବାସ ବାସଗୃହରୁ ବଞ୍ଚିତ କରାଯାଇଛି । ଏହାର ଉଚ୍ଚସ୍ତରୀୟ ତଦନ୍ତ କରି ଦୋଷୀ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ପ୍ରକୃତ ହିତାଧିକାରୀଙ୍କୁ ଖୁବଶୀଘ୍ର ବାସଗୃହ ଯୋଗାଇ ଦେବାକୁ ସାଧାରଣରେ ଦାବି ହେଉଛି।

ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ