ରାଇରଙ୍ଗପୁର:ଲକଡାଉନର ସୁଯୋଗ ନେଇ ଛେଳି ଚୋରି କରୁଥିବା ବେଳେ ଗ୍ରାମବାସୀଙ୍କ ହାତରେ ଧରାପଡି ନିର୍ଧୁମ ଛେଚା ଖାଇଲେ 4 ଚୋର । ଏଭଳି ଏକ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ଯାମଦା ଥାନା ଅଧିନ ଚାନ୍ଦିଖମଣ ଗ୍ରାମରେ ।
ଧରାପଡି ନିର୍ଧୁମ ଛେଚା ଖାଇଲେ 4 ଛେଳି ଚୋର, 3 ବାଇକ ଜବତ କଲା ପୋଲିସ ସୂଚନାନୁଯାୟୀ ଚାନ୍ଦିଖମଣ ଗ୍ରାମର ଜନୈକ ବ୍ୟକ୍ତି ଚରଣ ବିନ୍ଧାଣିଙ୍କ ଗୋଟିଏ ଛେଳିକୁ ଚାରି ଜଣ ଚୋର ଦୁଇଟି ବାଇକ ଯୋଗେ ନେଇ ପଳାଇ ଯାଉଥିବା ବେଳେ ଗ୍ରାମବାସୀଙ୍କ ହାବୁଡରେ ପଡି ଯାଇଥିଲେ । ଫଳରେ ଗାଁ ଲୋକେ ଚାରି ଚୋରଙ୍କୁ ନିର୍ଧୁମ ଛେଚି ପୋଲିସକୁ ଖବର ଦେଇଥିଲେ ।
ଘଟଣାସ୍ଥଳରେ ଯାମଦା ଥାନା ପୋଲିସ ପହଞ୍ଚି 4 ଜଣ ଚୋରଙ୍କୁ ଧରିବା ସହ ସେମାନେ ବ୍ୟବହାର କରୁଥିବା ଦୁଇଟି ବାଇକକୁ ମଧ୍ୟ ଜବତ କରିଥିଲେ । ତେବେ ସେଥି ମଧ୍ୟରୁ ଚୋରା ହିରୋ ଗ୍ଲାମର ବାଇକଟି ରାଇରଙ୍ଗପୁର ଗ୍ରାମାଞ୍ଚଳ ଥାନା ଅଞ୍ଚଳରୁ ଚୋରି ହୋଇଥିବା ନେଇ ପୋଲିସ ପକ୍ଷରୁ ସୂଚନା ମିଳିଛି ।
ଗିରଫ ଚାରିଜଣଙ୍କ ମଧ୍ୟରୁ ଦୁଇ ଜଣ ରାଇରଙ୍ଗପୁର ଟାଉନ ଥାନା ଅନ୍ତର୍ଗତ ଅଁଳାଡୁବାର ବ୍ରିଜେଶ ଗୋପ ଓ ମଙ୍ଗୁଳୁ ନାଏକଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ବେଳେ ଅନ୍ୟ ଦୁଇ ଜଣ ନାବାଳକ ଥିବାରୁ ସେମାନଙ୍କୁ ନୋଟିସ୍ ଦିଆଯାଇ ପରିବାର ଲୋକଙ୍କୁ ହସ୍ତାନ୍ତର କରାଯାଇଛି ।
ରାଇରଙ୍ଗପୁରରୁ ସଞ୍ଜୟ କୁମାର ପରିଡା, ଇଟିଭି ଭାରତ
