ଓଡିଶା-ପଶ୍ଚିମବଙ୍ଗ ବର୍ଡ଼ରର ସ୍ଥିତି ପରଖିଲେ ପୋଲିସ ଡିଜି ଅଭୟ

କୋରୋନା ଭାଇରସ ରୋକିବାକୁ ଲକଡାଉନ ସାରା ଦେଶ । ମଙ୍ଗଳବାର ମୟୂରଭଞ୍ଜ ଗସ୍ତରେ ଆସି ପଶ୍ଚିମବଙ୍ଗ ବର୍ଡ଼ରର ସ୍ଥିତି ପରଖିଛନ୍ତି ରାଜ୍ୟ ପୋଲିସ ମହାନିର୍ଦ୍ଦେଶକ ଅଭୟ କୁମାର । ଅଧିକ ପଢନ୍ତୁ...

ବାରିପଦା: ମୟୂରଭଞ୍ଜର ପୋଲିସ ସୁରକ୍ଷା ବ୍ୟବସ୍ଥାର ସ୍ଥିତି ପରଖିବାକୁ ହେଲିକପ୍ଟର ଯୋଗେ ବାରିପଦାରେ ପହଞ୍ଚିଲେ ରାଜ୍ୟ ପୋଲିସ ମହାନିର୍ଦ୍ଦେଶକ ଅଭୟ କୁମାର । ମଙ୍ଗଳବାର ଅପରାହ୍ନ 2ଟା 10ରେ ସେ ମୟୂରଭଞ୍ଜରେ ପହଞ୍ଚିଥିଲେ ।

ସେଠାରେ ମୟୂରଭଞ୍ଜ ଏସପି ପରମାର ସ୍ମିଥ ପୁରୁଷୋତ୍ତମ ଦାସ ଏବଂ ବରିଷ୍ଠ ପୋଲିସ ଅଧିକାରୀ ମାନେ ତାଙ୍କୁ ସ୍ୱାଗତ କରିଥିଲେ । ଏହା ଡିଜି ଅଭୟ ଓଡିଶା-ପଶ୍ଚିମବଙ୍ଗ ବର୍ଡ଼ର ଚକଶୁଳିଆପଦା ଠାରେ ପହଞ୍ଚି ସେଠାରେ ପୋଲିସ ସୁରକ୍ଷା ବ୍ୟବସ୍ଥା ଯାଞ୍ଚ କରିବା ସହ ବର୍ଡରର ସ୍ଥିତି ପରଖିଥିଲେ ।

ତେବେ ଓଡ଼ିଶାରେ ପଶ୍ଚିମବଙ୍ଗ ଲିଙ୍କରୁ କୋରୋନା ସଂକ୍ରମିତଙ୍କ ସଂଖ୍ୟା ବଢୁଥିବାରୁ ପଶ୍ଚିମବଙ୍ଗ-ଓଡିଶା ବର୍ଡ଼ରରେ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । ଅନ୍ୟପକ୍ଷରେ ବର୍ତ୍ତମାନ ପର୍ଯ୍ୟନ୍ତ ମୟୂରଭଞ୍ଜ ଜିଲ୍ଲାରେ ଜଣେ ବି କୋରୋନା ପଜିଟିଭ ଚିହ୍ନଟ ହୋଇନଥିବାରୁ ମୟୂରଭଞ୍ଜ ଏସପି ଓ ଜିଲ୍ଲାପାଳଙ୍କୁ ଧନ୍ୟବାଦ ଜଣାଇଛନ୍ତି ପୋଲିସ ମହାନିର୍ଦ୍ଦେଶକ ।

ସୂଚନାନୁସାରେ, ମଙ୍ଗଳବାର ଅପରାହ୍ନ ସୁଦ୍ଧାରେ ରାଜ୍ୟରେ କୋରୋନା ଆକ୍ରାନ୍ତଙ୍କ ସଂଖ୍ୟା 79 ଛଇଁଛି ।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ