ରାଇରଙ୍ଗପୁର:ଓଡିଶା ଲୋକ ସେବା ଆୟୋଗ (OPCS) ଦ୍ବାରା ପରିଚାଳିତ ଓଡିଶା ପ୍ରଶାସନିକ ସେବା ପରୀକ୍ଷାରେ (OAS) ପରୀକ୍ଷାରେ ୧୧ତମ ସ୍ଥାନ ଅଧିକାର କରିଛନ୍ତି ରାଇରଙ୍ଗପୁର ଯଶିପୁର ବ୍ଲକର ପଙ୍କଜ କୁମାର ମହାନ୍ତ । ପଙ୍କଜଙ୍କ ବାପା ବିଶ୍ଵନାଥ ମହାନ୍ତ ଯଶିପୁର ବ୍ଲକ ଦୁର୍ଦ୍ଦୁରା ଉଚ୍ଚ ବିଦ୍ୟାଳୟରେ ଶିକ୍ଷକ ଥିବା ବେଳେ ମାତା ଜୟନ୍ତୀ କାଶିପାଳ ପ୍ରାଥମିକ ବିଦ୍ୟାଳୟରେ ପ୍ରଧାନ ଶିକ୍ଷୟିତ୍ରୀ ଭାବେ କାର୍ଯ୍ୟ କରୁଛନ୍ତି ।
ଯଶିପୁର ବଜାର ଭଣ୍ଡାରିପୋଷି କଲୋନୀର ବାସିନ୍ଦା ପଙ୍କଜ ଯଶିପୁର ସରକାରୀ ହାଇସ୍କୁଲରୁ ମାଟ୍ରିକ, ବାରିପଦାର ଏକ ଆବାସିକ କଲେଜରୁ +୨ ରେ ସଫଳତା ହାସଲ କରିବା ପରେ ଓୟୁଏଟି ବିଶ୍ଵବିଦ୍ୟାଳୟରୁ ବିଜ୍ଞାନରେ ସ୍ନାତକ ସମାପ୍ତ କରିଥିଲେ । ପରେ ଉଚ୍ଚଶିକ୍ଷା ପାଇଁ ପ୍ରତିଷ୍ଠିତ ବନାରସ ହିନ୍ଦୁ ବିଶ୍ବବିଦ୍ୟାଳୟରେ ମଧ୍ୟ ଅଧ୍ୟୟନ କରିଥିଲେ । କୀଟ ବିଜ୍ଞାନରେ ସ୍ନାତକୋତ୍ତର ଡିଗ୍ରୀରେ ପ୍ରଥମ ସ୍ଥାନ ଅଧିକାର କରି ସ୍ଵର୍ଣ୍ଣ ପଦକ ହାସଲ କରି ଓଡ଼ିଶା ପାଇଁ ଗୌରବ ଆଣିଥିଲେ ପଙ୍କଜ ।