ରାଇରଙ୍ଗପୁର: ମୟୂରଭଞ୍ଜ ଜିଲ୍ଲାରେ ଥମିବାର ନା ଧରୁନି ହାତୀ ଆକ୍ରମଣ । ବୁଧବାର ରାତିରେ ପୁଣି ହାତୀ ଆକ୍ରମଣରେ ଦୈତାରୀ ନାଏକ ନାମକ ଜନୈକ ବୃଦ୍ଧଙ୍କର ମୃତ୍ୟୁ ହୋଇଛି ।
ବୁଧବାର ରାତି 8ଟା ସମୟରେ ହାତୀପଲ ଏକତାଳି ଜଙ୍ଗଲରୁ ବାହାରି ବାଟଗୌଡ଼ଗାଁ ଦେଇ ଆସିବା ବେଳକୁ ତାଙ୍କ ସାମ୍ନାକୁ ଦୈତାରୀ ନାଏକ ଆସିଯାଇଥିଲେ । ଏହି ସମୟରେ ଏକ ଦନ୍ତା ହାତୀ ଆକ୍ରମଣ କରିବା ପାଇଁ ଗୋଡାଇଥିଲା ଫଳରେ ଏକ କୂଅ ଭିତରେ ଦୈତାରୀ ଖସି ପଡିବାରୁ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା ।
ହାତୀ ନିକଟରେ ଥିବାରୁ ଗ୍ରାମବାସୀ କିମ୍ବା ବନବିଭାଗ କର୍ମଚାରୀ ଶ୍ରୀ ନାଏକଙ୍କୁ ଉଦ୍ଧାର କରିବାରେ ବିଳମ୍ବ ହୋଇଥିଲା । ହାତୀ ଯିବାପରେ ଗ୍ରାମବାସୀ ମାନେ କୂଅରୁ ଉଦ୍ଧାର କରି କରଞ୍ଜିଆ ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରିଥିଲେ । ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଗୁରୁବାର ମୃତଦେହ ବ୍ୟବଚ୍ଛେଦ ପରେ ପରିବାରକୁ ହସ୍ତାନ୍ତର କରାଯିବ ବୋଲି ଡାକ୍ତର ସୂଚନା ଦେଇଛନ୍ତି ।
ଏଇ ଘଟଣାକୁ ନେଇ ବନ ବିଭାଗକୁ ଦାୟୀ କରାଯାଇ କିଛି ସମୟ ଧରି ଗାଁରେ ଉତ୍ତେଜନା ଦେଖାଦେଇଥିଲା । ତେବେ ମୃତକ ପରିବାରଙ୍କୁ ଉଚିତ କ୍ଷତିପୂରଣ ଯୋଗାଇବା ସହିତ ନିକଟରେ ଥିବା ହାତୀ ପଲଙ୍କୁ ତୁରନ୍ତ ଘଉଡେଇବା ଦାବି କରିଛନ୍ତି ପରିବାର ତଥା ଗ୍ରାମବାସୀ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ