ପଥରଖୋଲ ମୃତଦେହ ଉଦ୍ଧାର ଘଟଣାର ପର୍ଦ୍ଦାଫାସ, ଡାହାଣୀ ସନ୍ଦେହରେ ହୋଇଥିଲା ହତ୍ୟା

ମୟୂରଭଞ୍ଜ ଜିଲ୍ଲା ଘୁଳୁଘୁଳିଆ ଗ୍ରାମ ବିଦିରିସାହି ନିକଟସ୍ଥ ଦଣ୍ଡାହୁଡ଼ିର ପଥରଖୋଲ ଭିତରୁ ନିଖୋଜ ବୃଦ୍ଧଙ୍କ ମୃତଦେହ ଉଦ୍ଧାର । ମୃତଦେହ ମିଳିବା ପରେ ଘଟଣାର ପର୍ଦ୍ଦାଫାସ କରିଛି ପୋଲିସ । ଏହି ଘଟଣାରେ ପୋଲିସ ୫ ଜଣ ଅଭିଯୁକ୍ତଙ୍କୁ ଗିରଫ କରିଛି । ଅଧିକ ପଢ଼ନ୍ତୁ

ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା ଘୁଳୁଘୁଳିଆ ଗ୍ରାମ ବିଦିରିସାହି ନିକଟସ୍ଥ ଦଣ୍ଡାହୁଡ଼ିର ପଥରଖୋଲ ଭିତରୁ ନିଖୋଜ ବୃଦ୍ଧଙ୍କ ମୃତଦେହ ଉଦ୍ଧାର ଘଟଣାର ପର୍ଦ୍ଦାଫାସ । ଏହି ଘଟଣାରେ ପୋଲିସ ୫ଜଣ ଅଭିଯୁକ୍ତଙ୍କୁ ଗିରଫ କରିଛି । ସୂଚନାନୁସାରେ ଗତ ୨୦୨୧ ମସିହା ଫେବୃଆରୀ ମାସ ୫ ତାରିଖ ଦିନ ଜଣେ ବୃଦ୍ଧଙ୍କ ଗଳିତ ମୃତଦେହକୁ ପୋଲିସ ଉଦ୍ଧାର କରିଥିଲା । ଶେଷରେ ଘଟଣାର ପର୍ଦ୍ଦାଫାସ କରି ଅଭିଯୁକ୍ତଙ୍କୁ ବାନ୍ଧିଛି ପୋଲିସ ।

ଦୀର୍ଘ 19 ମାସ ପରେ ଗତ ମଙ୍ଗଳବାର ଏହି ଘଟଣାରେ ପୋଲିସ ୫ଜଣ ଅଭିଯୁକ୍ତକୁ ଗିରଫ କରିଛି । ଗିରଫ ୫ଜଣ ଅଭିଯୁକ୍ତ ଗୁଣିଗାରେଡି ସନ୍ଦେହରେ ବୃଦ୍ଧଙ୍କୁ ଠେଙ୍ଗାରେ ପିଟି ପିଟି ନିର୍ମମ ହତ୍ୟା କରି ପଥର ଖୋଲରେ ପକାଇ ଦେଇଥିବା ନେଇ ମହୁଲଡ଼ିହା ଥାନା ଆଇଆଇସି ସଞ୍ଜୀବ କୁମାର ପରିଡା ସୂଚନା ଦେଇଛନ୍ତି ।

ଗିରଫ ୫ ଜଣ ଅଭିଯୁକ୍ତ ହେଲେ ଘୁଳୁଘୁଳିଆ ଗ୍ରାମର ସାଲୁକା ହାଇବରୁ, ଶ୍ୟାମସୁନ୍ଦର ହାଇବରୁ, ଚକ୍ରଧର ହାଇବୁରୁ, ମାର୍କଣ୍ଡ ହାଇବୁରୁ , ମରତମ ହାଇବୁରୁ ବୋଲି ଜଣାପଡିଛି । ସୂଚନା ଅନୁଯାୟୀ, ମୃତ ବୃଦ୍ଧଙ୍କ ନାତି ବନ ହାଇବୁରୁ ଗତ ୨୦୨୧ ଜାନୁଆରୀ ମାସ ୨୫ ତାରିଖ ଦିନ ଜେଜେବାପାଙ୍କ ନିଖୋଜ ନେଇ ମହୁଲଡ଼ିହା ଥାନାରେ ଲିଖିତ ଅଭିଯୋଗ କରିଥିଲେ ।

ତେବେ ଫେବ୍ରୁଆରୀ ମାସ ୫ ତାରିଖ ଦିନ ପଥର ଖୋଲରୁ ବୃଦ୍ଧଙ୍କ ଗଳିତ ମୃତଦେହକୁ ପୋଲିସ ଠାବ କରିଥିଲା । ବୃଦ୍ଧଙ୍କୁ କେହି ହତ୍ୟା କରି ଫିଙ୍ଗି ଦେଇଥିବା ନେଇ ପରିବାର ଲୋକେ ଅଭିଯୋଗ ଆଣିଥିଲେ । ପୋଲିସ ସେତେବେଳେ ସନ୍ଧାନୀ କୁକୁର ସହ ସାଇଣ୍ଟିଫିକ ଟିମ ନେଇ ତଦନ୍ତ କରିଥିଲେ ମଧ୍ୟ ସନ୍ଦେହ କରାଯାଉଥିବା ହତ୍ୟାକାଣ୍ଡ ସମ୍ପର୍କରେ କୌଣସି ସୁରାକ ପୋଲିସ ସେ ସମୟରେ ପାଇ ପାରିନଥିଲା ।

ପୋଲିସ କିନ୍ତୁ ଏହି ଘଟଣାର ତଦନ୍ତ ଜାରି ରଖିଥିଲା । ହତ୍ୟାକାଣ୍ଡର 19ମାସ ପରେ ପୋଲିସ ହତ୍ୟାକାଣ୍ଡର ସୁରାକ ପାଇ ଏହି ୫ ଜଣ ଅଭିଯୁକ୍ତଙ୍କୁ ଗିରଫ କରିଛି । ୫ ଜଣ ଅଭିଯୁକ୍ତ ବୃଦ୍ଧ ଜଣକୁ ଡାହାଣୀ ହୋଇ ଗ୍ରାମର କ୍ଷତି କରୁଥିବାର ସନ୍ଦେହ କରୁଥିଲେ । ଗତ ୨୦୨୧ ମସିହା ଫେବୃୟାରୀ ୨୫ ତାରିଖ ଦିନ ଏହି ୫ ଅଭିଯୁକ୍ତ ଦଣ୍ଡାହୁଡ଼ି ନିକଟରେ ବୃଦ୍ଧଙ୍କୁ ଏକୁଟିଆ ପାଇ ଠେଙ୍ଗାରେ ପିଟିପିଟି ହତ୍ୟା କରିଥିବା ନେଇ ପୋଲିସ ଆଗରେ ସ୍ୱୀକାର କରିଛନ୍ତି ।

ସେମାନେ ହତ୍ୟା କରିବା ପରେ ମୃତଦେହକୁ ଏକ ପଥର ଖୋଲ ଭିତରେ ପକାଇ ଦେଇଥିଲେ । ଯାହାଫଳରେ ମହୁଲଡ଼ିହା ଥାନା ପୋଲିସ ଏକ ହତ୍ୟା ମାମଲା ରୁଜ୍ଜୁ କରି ତଦନ୍ତ କରୁଥିଲା । ଶେଷରେ ପୋଲିସକୁ ସଫଳତା ମିଳିଛି ।

ଇଟିଭି ଭାରତ, ରାଇରଙ୍ଗପୁର