ରାଇରଙ୍ଗପୁର: ନକଲି ସୁନା ବଦଳ କରି ଲକ୍ଷାଧିକ ଟଙ୍କାର ସୁନା ଠକିନେଲେ ବୃଦ୍ଧ । ଏପରି ଘଟଣା ସାମ୍ନାକୁ ଆସୁଛି ମୟୂରଭଞ୍ଜ ଜିଲ୍ଲା ଠାକୁରମୁଣ୍ଡା ବଜାରରୁ । ନୂତନ ଭାବେ ଖୋଲା ଯାଇଥିବା ଓମ ମା ମଙ୍ଗଳା ଜୁଏଲରୀରୁ ଶୁକ୍ରବାର ଦିନ ସୁବ୍ରତ ଦାସ ନାମକ ଜଣେ ବୃଦ୍ଧ ନକଲି ସୁନା ଚେନକୁ ବଦଳ କରି ପ୍ରତିବଦଳରେ ଲକ୍ଷାଧିକ ଟଙ୍କା ମୂଲ୍ୟର ବିଭିନ୍ନ ପ୍ରକାର ସୁନା ଗହଣା ସାମଗ୍ରୀ ଦୋକାନରୁ ନେଇ ଚମ୍ପଟ ମାରିଛନ୍ତି । ଏନେଇ ଦୋକାନର ମାଲିକ ରଞ୍ଜନ କୁମାର ସାହୁ ଠାକୁରମୁଣ୍ଡା ଥାନାରେ ଲିଖିତ ଅଭିଯୋଗ କରିଛନ୍ତି ।
ସୂଚନା ଅନୁଯାୟୀ ଠାକୁରମୁଣ୍ଡା -ଆନନ୍ଦପୁର ରାସ୍ତାର ମହାନ୍ତି ମାର୍କେଟ କମ୍ପ୍ଲେକ୍ସରେ ଗତ ମାସେ ପୂର୍ବରୁ ନୂତନ ଭାବରେ ଓମ ମା" ମଙ୍ଗଳା ଜୁଏଲରୀ ନାମରେ ଏକ ସୁନା ଦୋକାନ ଖୋଲିଥିଲେ । ତେବେ ଗତ ଶୁକ୍ରବାର ପ୍ରାୟ ୩.୩୦ ସମୟରେ ଜଣେ ବୃଦ୍ଧ ଲୋକ ଦୋକାନକୁ ଆସି ୬୧ ଗ୍ରାମ ୭୦୦ ମିଲିଗ୍ରାମ ଓଜନର ଗୋଟିଏ ସୁନା ଚେନ ବଦଳାଇ ବିଭିନ୍ନ ପ୍ରକାରର ଅଳଙ୍କାର ନେବାକୁ ଚାହିଁଥିଲେ । ସମ୍ପୃକ୍ତ ବୃଦ୍ଧ ଜଣକ ବମ୍ବେରେ ୧୫ ବର୍ଷ ଧରି ଚାକିରୀ କରି ଅବସର ପରେ ଠାକୁରମୁଣ୍ଡା ନିକଟ ମହୁଲଡିହାରେ ଘର କରି ରହୁଥିବାର ପରିଚୟ ଦେଇ ବିଶ୍ବାସ ଜନ୍ମାଇ ଥିଲେ ।