ରାଇରଙ୍ଗପୁର: ଭଙ୍ଗା ଦଦରା ଚାଳ ଘର । ପୁଣି କେଉଁଠି କାନ୍ଥ ଫାଟି ଆଁ କରିଛି । ଯେଉଁଠି ଖାଇବା ସେଇଠି ଶୋଇବା । ବର୍ଷା ହେଲେତ କଥା ସରିଲା । ଜରାଜୀର୍ଣ୍ଣ ଅବସ୍ଥାକୁ ଚାଲିଯାଇଥିବା ଏହି ଘରେ ରହୁଛନ୍ତି ମୟୂରଭଞ୍ଜ ଜିଲ୍ଲା ଗିଦିଘାଟୀ ଗ୍ରାମପଞ୍ଚାୟତ ଅନ୍ତର୍ଗତ ଗିଦିଘାଟୀ ଗ୍ରାମର ବୃଦ୍ଧ ଦମ୍ପତି ଫୁଲେଶ୍ବରୀ ପାତ୍ର ଓ ତାଙ୍କ ସ୍ବାମୀ ସୁଗୁଦା ପାତ୍ର ।
ଏହି ବୃଦ୍ଧ ଦମ୍ପତି ଦ୍ବୟ ପରିଣତ ବୟସରେ ନଡାଛପର ଯୁକ୍ତ କଚ୍ଚା ଘରେ ବହୁ କଷ୍ଟରେ ବସବାସ କରୁଛନ୍ତି । ସାମାନ୍ୟ ବର୍ଷାରେ ପାଣି ଝରି କାନ୍ଥ ଏବଂ ଘରର ଚଟାଣ ଅଦା ହୋଇ ପଡୁଥିବା ବେଳେ ଘର କାନ୍ଥ ଦୁର୍ବଳ ହୋଇ ରହିଛି । କେଉଁ ମୁହୁର୍ତ୍ତରେ ଘରର କାନ୍ଥ ଭୁଶୁଡି ପଡି ଜୀବନ ଚାଲିଯିବା ତାହା କାହାକୁ ବି ଜଣା ନାହିଁ ।
ମୌସୁମୀ ବର୍ଷା ଋତୁ ପାଖେଇ ଆସୁଥିବାବେଳେ ଦୁଃଖ ଦୁର୍ଦ୍ଦଶା ରେ ରହୁଥିବା ଏହି ବୃଦ୍ଧ ଦମ୍ପତି ଆଶା ଆଶଙ୍କାରେ ସମୟ ଅତିବାହିତ କରି ଚାଲିଛନ୍ତି। ଗରିବଙ୍କ ପାଇଁ ସରକାରଙ୍କ ଅନେକ ଯୋଜନା ଥିବା ବେଳେ କିନ୍ତୁ ଏସବୁରୁ ବଞ୍ଚିତ ହୋଇଛନ୍ତି ଏହି ବୃଦ୍ଧ ଦମ୍ପତି । ଯାହା ଏ ଘରର ଚିତ୍ର ହିଁ ବୟାନ କରୁଛି । ସରକାରୀ ଯୋଜନାରେ ଘର ଖଣ୍ଡିଏ ପାଇଁ ଏହି ବୃଦ୍ଧ ଦମ୍ପତି ଏବେ ଅନାଇ ବସିଛନ୍ତି ।