ରାଇରଙ୍ଗପୁର:ଝାଡଖଣ୍ଡସ୍ଥିତ ଜାମସେଦପୁରର webco India Ltdରେ ସୁପରଭାଇଜର ଭାବେ କାମ କରୁଥିବା ଜଣେ ଓଡିଆଙ୍କୁ ହତ୍ୟା ଅଭିଯୋଗ । ମୃତକ ମୟୂରଭଞ୍ଜ ଜିଲ୍ଲା ଜାମଦା ଥାନା ଅନ୍ତର୍ଗତ କୁଚେଇପାଳ ଗ୍ରାମର ଲକ୍ଷ୍ମଣ ସୋୟଙ୍କ ପୁଅ ବାଇଜୁ ସୋୟ । ବାଇଜୁଙ୍କୁ ଝାଡଖଣ୍ଡରେ ସଙ୍ଘବଦ୍ଧ ଭାବେ ଆକ୍ରମଣ କରାଯାଇ ହତ୍ୟା କରାଯାଇଥିବାର ଅଭିଯୋଗ ଆଣିଛନ୍ତି ତାଙ୍କ ପରିବାର ଲୋକେ ।
ସୂଚନାଯୋଗ୍ୟ, କୁଚେଇପାଳ ଗ୍ରାମର ଶିକ୍ଷକ ଲକ୍ଷ୍ମଣ ସୋୟଙ୍କ ପରିବାର ରାଇରଙ୍ଗପୁର ଟାଉନ ଥାନା ଅନ୍ତର୍ଗତ ପୁରୁଣାଘାଟୀ ଗ୍ରାମରେ ରହୁନ୍ତି । ଲକ୍ଷ୍ମଣଙ୍କ ପୁଅ ବାଇଜୁ(୩୫) ଜାମସେଦପୁରର webco India କମ୍ପାନୀରେ ସୁପରଭାଇଜର ଭାବେ କାମ କରୁଥିଲେ । ସୋମବାର ବାଇଜୁଙ୍କ ଫୋନରୁ ତାଙ୍କ ପରିବାର ଲୋକଙ୍କୁ ଏକ କଲ୍ ଆସିଥିଲା । କଲରେ କେହି ଜଣେ ବ୍ୟକ୍ତି ବାଇଜୁଙ୍କୁ ଜୀବନରୁ ମାରି ଦେବେ ବୋଲି କହିଥିଲେ । ଫୋନ ଯୋଗେ ଏହି କଥା ଶୁଣିବା ପରେ ପରିବାର ଲୋକେ ଜାମସେଦପୁର ସୁନ୍ଦରନଗରସ୍ଥିତ ନୀଲଡୁଙ୍ଗୁରୀକୁ ଯାଇ ସେଠାରେ ପୁଅକୁ ଗୁରୁତର ଅବସ୍ଥାରେ ଉଦ୍ଧାର କରିଥିଲେ ଏବଂ ରାଇରଙ୍ଗପୁର ମେଡିକାଲରେ ଭର୍ତ୍ତି କରିଥିଲେ । ପରେ ବାଇଜୁଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବାରିପଦା ପିଆରଏମ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । କିନ୍ତୁ ମଙ୍ଗଳବାର ଭୋର୍ ୪ଟା ୩୦ରେ ତାଙ୍କ ମୃତ୍ୟୁ ଘଟିଥିଲା ।