ରାଇରଙ୍ଗପୁର: ତ୍ରିସ୍ତରୀୟ ପଞ୍ଚାୟତିରାଜ ନିର୍ବାଚନ ପାଇଁ ଆରମ୍ଭ ହେଲାଣି ବିଭିନ୍ନ ରାଜନୈତିକ ଦଳର କସରତ । ନିଜ ନିଜ ଦଳପ୍ରତି ଭୋଟରଙ୍କୁ ଆକୃଷ୍ଟ କରିବା ପାଇଁ ଜୋରଦାର ଚାଲିଛି ଜୋନ୍ ଓ ପଞ୍ଚାୟତ ସ୍ତରୀୟ ନିର୍ବାଚନୀ ସଭା । ଏହି ପରିପ୍ରେକ୍ଷୀରେ ମୟୂରଭଞ୍ଜ ଜିଲ୍ଲାରେ ବିଜେଡି ଆଗରେ ରହିଛି । ଗ୍ରାମାଞ୍ଚଳକୁ ଘନଘନ ଗସ୍ତ କରୁଛନ୍ତି ନେତା ଓ ମନ୍ତ୍ରୀ । ମୟୂରଭଞ୍ଜ ଜିଲ୍ଲାରେ ୫୬ଟି ଜୋନ୍ ରହିଥିବା ବେଳେ ପ୍ରତ୍ୟେକ ଦିନ ବିଭିନ୍ନ ଜୋନ୍ ଓ ପଞ୍ଚାୟତରେ ବିଜେଡି ନିଜ ଦଳକୁ ମଜବୁତ ଓ କର୍ମୀଙ୍କୁ ସକ୍ରିୟ କରିବା ନେଇ ଆରମ୍ଭ କରିଛି ସଂକଳ୍ପ ସମାବେଶ ।
ନିର୍ବାଚନୀ କସରତ ଆରମ୍ଭ, ବିଜେଡିରେ ୪୦୦ରୁ ଉର୍ଦ୍ଧ୍ବ କର୍ମୀଙ୍କ ଯୋଗଦାନ ମୟୂରଭଞ୍ଜ ଜିଲ୍ଲା କୁସୁମୀ ବ୍ଲକର ୧୦ନଂ ଜୋନ ଜୋରଦା ଗ୍ରାମରେ ଅନୁଷ୍ଠିତ ବିଜେଡିର ସଂକଳ୍ପ ସମାବେଶରେ ରାଜସ୍ୱ ମନ୍ତ୍ରୀ ସୁଦାମ ମାରାଣ୍ଡି ଯୋଗ ଦେଇଥିବା ବେଳେ ୪୦୦ରୁ ଉର୍ଦ୍ଧ୍ବ କର୍ମୀ ବିଜେଡିରେ ଯୋଗଦାନ କରିଥିଲେ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନୀତି , ଆଦର୍ଶରେ ଅନୁପ୍ରାଣିତ ହୋଇ ବିଭିନ୍ନ ଦଳର କର୍ମୀ ବିଜେଡିରେ ଯୋଗଦାନ କରିବା ନିଶ୍ଚିତ ଭାବରେ ବିଜେଡିର ତ୍ରିସ୍ତରୀୟ ପଞ୍ଚାୟତ ନିର୍ବାଚନରେ ଆଗୁଆ ବିଜୟ ବୋଲି କହିଥିଲେ ମନ୍ତ୍ରୀ ସୁଦାମ । ଏହି ଅବସରରେ କୃଷି ଶିଳ୍ପ ନିଗମ ଅଧକ୍ଷ ଦେବାଶିଷ ମହାନ୍ତି, ବରିଷ୍ଠ ନେତା ମହେଶ ହେମ୍ବ୍ରମ ରାଜ୍ୟ ସରକାରଙ୍କ ବିଭିନ୍ନ ଜନହିତକର ଯୋଜନା ଗୁଡିକ ବଖାଣିବା ସହ କେନ୍ଦ୍ର ସରକାରଙ୍କ ଜନ ମାରଣ ନୀତି ସମ୍ପର୍କରେ ଜନସାଧାରଣଙ୍କୁ ବୁଝାଇଥିଲେ ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
