ଦ୍ବିତୀୟ ଶ୍ରୀକ୍ଷେତ୍ରରେ ରଥାରୂଢ ଚତୁର୍ଦ୍ଧାମୂର୍ତ୍ତୀ, ଆସନ୍ତାକାଲି ରଥାଟଣା

ପବିତ୍ର ରଥଯାତ୍ରା ପାଇଁ ଆଜି ସମଗ୍ର ଦେଶରେ ଶ୍ରୀଜୀଉମାନେ ରଥାରୂଢ ହୋଇ ଭକ୍ତଙ୍କ ଗହଣରେ ଗୁଣ୍ଡିଚା ମନ୍ଦିର ଯାତ୍ରା କରୁଥିବା ବେଳେ ଦ୍ବିତୀୟ ଶ୍ରୀକ୍ଷେତ୍ର ବାରିପଦାରେ ପରମ୍ପରା ନିଆରା । ବାରିପଦାରେ ଆଜି ଶ୍ରୀଜୀଉଙ୍କ ପହଣ୍ଡି ପରେ ରଥାରୂଢ ହୋଇଛନ୍ତି ଚତୁର୍ଦ୍ଧାମୂର୍ତ୍ତୀ ।

ବାରିପଦା: ଆଜି ବିଶ୍ବ ପ୍ରସିଦ୍ଧ ରଥଯାତ୍ରା । ପବିତ୍ର ଘୋଷଯାତ୍ରାକୁ ନେଇ ଚଳଚଞ୍ଚଳ ସାରା ରାଜ୍ୟ । ସାରା ବିଶ୍ବରେ ଆଜି ଚତୁର୍ଦ୍ଧାମୂର୍ତ୍ତୀ ରଥାରୂଢ ହୋଇ ନବଦିନାତ୍ମକ ଯାତ୍ରାରେ ମାଉସୀମା ଘରକୁ ଯାଉଛନ୍ତି । ହେଲେ ଦ୍ବିତୀୟ ଶ୍ରୀକ୍ଷେତ୍ର ଭାବେ ପରିଚିତ ହରିବଳଦେବ ଜୀଉରେ ଆସନ୍ତାକାଲି ହେବ ରଥଟଣା । ହେଲେ ଆଜି ପହଣ୍ଡି ବିଜେ ପରେ ମହାପ୍ରଭୁଙ୍କୁ ରଥାରୂଢ କରାଯାଇଛି ।

ଏଠାରେ ରଥଯାତ୍ରା ଦିନ ଚତୁର୍ଦ୍ଧାମୂର୍ତ୍ତୀଙ୍କୁ ରଥାରୂଢ କରାଯାଇଥାଏ । ହେଲେ ରଥଯାତ୍ରା ପର ଦିନ ରଥଟଣା ହୋଇଥାଏ । ଏପଟେ ରଥାରୂଢ ପ୍ରଭୁଙ୍କ ଦର୍ଶନ ପାଇଁ ଛୁଟୁଛି ଶ୍ରଦ୍ଧାଳୁଙ୍କ ସୁଅ । ଶହ ଶହ ଶ୍ରଦ୍ଧାଳୁ ରଥାରୂଢ ଚତୁର୍ଦ୍ଧାମୂର୍ତ୍ତୀଙ୍କୁ ଦର୍ଶନ କରିଥିଲେ ।

ପରମ୍ପରା ଅନୁସାରେ, ବାରିପଦାର ଅଧିଷ୍ଠାତ୍ରୀ ଦେବୀ ମା ଅମ୍ବିକାଙ୍କ ନିକଟରୁ ଆଜ୍ଞାମାଳ ଅଣାଯାଇ ରଥ ପ୍ରତିଷ୍ଠା ହୋଇଥାଏ । ମା ଏହି ଆଜ୍ଞାମାଳ ରଥ ଚାରିପଟେ ପରିକ୍ରମା ପରେ ରଥ ପବିତ୍ର କରାଯାଇଥାଏ । ବିଶ୍ବାସ ରହିଛି, ରଥରେ ଯେପରି ଅଘଟଣ କିମ୍ନା ଅସୁବିଧା ନ ହେବ, ସେଥିପାଇଁ ଦାୟିତ୍ୱ ନେଇଥାନ୍ତି ମା ଅମ୍ବିକା ।

ଅନ୍ୟପଟେ ରଥଯାତ୍ରାକୁ ଦୃଷ୍ଟିରେ ରଖି ସୁରକ୍ଷା ବ୍ୟବସ୍ଥା କଡାକଡି କରାଯାଇଛି ।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ