ରାଇରଙ୍ଗପୁର: ମୟୁରଭଞ୍ଜ ନେହେରୁ ଯୁବକେନ୍ଦ୍ର ପକ୍ଷରୁ ପାଳିତ ହୋଇଛି ରାଷ୍ଟ୍ରୀୟ ପୋଷଣ ଦିବସ । ବହଳଦା ବ୍ଲକ ଅନ୍ତର୍ଗତ ଝରାଡିହି ନିକଟସ୍ଥ ମଝିଗାଁ ଗ୍ରାମର ଅଙ୍ଗନଓ୍ବାଡି କେନ୍ଦ୍ରରେ ନେହେରୁ ଯୁବକେନ୍ଦ୍ରର ସଦସ୍ୟମାନେ ପୋଷଣ ଦିବସ ପାଳନ କରିଛନ୍ତି ।
ନେହେରୁ ଯୁବକେନ୍ଦ୍ର ପାଳିଲା ରାଷ୍ଟ୍ରୀୟ ପୋଷଣ ଦିବସ
ସ୍ଥାନୀୟ ମହିଳା ଓ ଶିଶୁଙ୍କୁ କାର୍ଯ୍ୟକ୍ରମରେ ସାମିଲ କରାଯାଇଥିଲା । ନେହେରୁ ଯୁବକେନ୍ଦ୍ର ସଂଗଠନର ସ୍ବୟଂ ସେବିକା ଲଳିତା ମହାନ୍ତ, ସଭାନେତ୍ରୀ ଭାବେ ସଭାପତିତ୍ବ କରିଥିଲେ । ଅଙ୍ଗନଓ୍ବାଡି କର୍ମୀ ସାଲଗେ ମାରାଣ୍ଡି, ମଝିଗାଁ ଗ୍ରାମର ଆଶାକର୍ମୀ ଶିବାନୀ ବାରିକ, ଆଦର୍ଶ କ୍ଲବର ସଂପାଦକ ସଞ୍ଜୟ ପଲେଇ ମଧ୍ୟ ଉପସ୍ଥିତ ରହିଥିଲେ । ଗର୍ଭବତୀ ମହିଳା ଓ ଶିଶୁ ମାନଙ୍କ ପାଇଁ ଉପଯୁକ୍ତ ସ୍ବାସ୍ଥ୍ୟ ଓ ଶାରୀରିକ ଗଠନରେ ଆବଶ୍ୟକ ପୋଷକ ତତ୍ବ ଓ ପୁଷ୍ଟିକର ଖାଦ୍ୟ ଗ୍ରହଣ ନେଇ ସଚେତନ କରଯାଇଥିଲା ।