ରାଇରଙ୍ଗପୁର: ଲଦାଖର ଗଲୱାନ ଉପତ୍ୟକାର ଭାରତ-ଚୀନ ପ୍ରକୃତ ନିୟନ୍ତ୍ରଣ ରେଖା(ଏଲଏସି)ରେ ସଂଘଟିତ ରାତିଅଧିଆ ଆକ୍ରମଣରେ ଶହୀଦ ହୋଇଛନ୍ତି ଭାରତର ୨୦ ଯବାନ। ତେବେ ଏହି ଶହୀଦ ବୀର ଯବାନଙ୍କ ମଧ୍ୟରେ ଅଛନ୍ତି ରାଇରଙ୍ଗପୁର ମାଟିର ପୁଅ ନନ୍ଦୁରାମ ସୋରେନ । ବୁଧବାର ସକାଳେ ଏ ଖବର ଆସିବା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି ।
ଭାରତ-ଚୀନ ଯବାନ ମୁହାଁମୁହିଁ: ଓଡିଆ ପୁଅ ନନ୍ଦୁରାମ ସୋରେନ ଶହୀଦ
ଶହୀଦ ନନ୍ଦୁରାମଙ୍କ ଘର ବିଜିତଳା ବ୍ଲକ ଅନ୍ତର୍ଗତ ବଡ଼ଚମ୍ପାଉଦା ଗ୍ରାମରେ । ସେ ଇଣ୍ଡିଆନ ଆର୍ମିରେ ୧୯୯୭ ମସିହାରେ ଯୋଗଦାନ କରି ଦୀର୍ଘ ୨୩ ବର୍ଷ ଧରି କାର୍ଯ୍ୟ କରୁଥିଲେ । ସେ ନାଏବ ସୁବେଦାର (ଜୁନିୟର କମାଣ୍ଡିଙ୍ଗ ଅଫିସର) ଭାବେ କାର୍ଯ୍ୟରତ ଥିଲେ। ଶହୀଦ ନନ୍ଦୁରାମଙ୍କ ବୟସ ୪୩ ବର୍ଷ ହୋଇଥିବା ଜଣାପଡିଛି ।