ବାରିପଦା: ମୟୂରଭଞ୍ଜ 49 ନଂ ଜାତୀୟ ରାଜପଥର ମା’ ଦ୍ବାରଶୁଣି ଘାଟି । ମନସ୍କାମନା ପୂରଣ ପାଇଁ ପ୍ରତିଦିନ କାହିଁ କେତେ ଦୂରରୁ ଏଠାକୁ ଛୁଟି ଆସନ୍ତି ଶ୍ରଦ୍ଧାଳୁ । ହେଲେ ଏବେ ଏହି ଘାଟି ପାଲଟିଛି ଡେଥ୍ ଜୋନ। ଦୁର୍ଘଟଣା ଯେପରି ଏଠାକାର ନିତିଦିନିଆ ଘଟଣା ହୋଇଗଲାଣି । ଏଠାକାର ଅଣଓସାରିଆ ଗଡ଼ାଣି ରାସ୍ତାରେ ଗଲା ବେଳେ ବ୍ରେକ ଫେଲ ହୋଇ ପ୍ରାଣ ହାରୁଛନ୍ତି ବହୁ ନିରୀହ ଜୀବନ । ଗଲା ଦୁଇ ବର୍ଷରେ 20ରୁ ଊର୍ଦ୍ଧ୍ବ ମୁଣ୍ଡ ନେଲାଣି ଏହି ଘାଟି ।
କୋଲକାତାରୁ ବମ୍ବେକୁ ସଂଯୋଗ କରୁଥିବା ଏହି ଘାଟିର ଲମ୍ବ ପ୍ରାୟ 6 କିଲୋମିଟର । ବହୁ ସମୟରେ ବିଶେଇରୁ ବାଙ୍ଗରିପୋଷି ଆସିବା ବେଳେ ହିଁ ଘଟିଥାଏ ଦୁର୍ଘଟଣା । ବଡ ବଡ ଉଠାଣି ଗଡାଣି ସହ ଅଣଓସାରିଆ ଓ ୟୁଟର୍ଣ୍ଣ ଏବଂ ଏସଟର୍ଣ୍ଣ । ଯେଉଁଥିପାଇଁ ଗଲା କିଛି ଦିନରେ 100ରୁ ଊର୍ଦ୍ଦ୍ବ ଦୁର୍ଘଟଣା ରେକର୍ଡ ହୋଇଛି । ଏନେଇ ଘାଟିରେ ସତର୍କ ସୂଚନା ଫଳକ ଲାଗିଛି । ହେଲେ ଦୁର୍ଘଟଣା କମିବା ବଦଳରେ ଦିନକୁ ଦିନକୁ ବଢିଚାଲିଛି । ଏଥିଲାଗି ମା’ଙ୍କର ଏହି ପବିତ୍ର ପୀଠର ରାସ୍ତା ଆଜି ମରଣଯନ୍ତା ଭାବେ ବଦନାମ ମୁଣ୍ଡାଉଛି । ଏ ନେଇ ଚିନ୍ତାରେ ଉଭୟ ଯାତ୍ରୀ ଓ ପଥଚାରୀ ।