ହରେକମାଲ ଦୋକାନରୁ ଲକ୍ଷାଧିକ ଟଙ୍କା ଲୁଟିନେଲେ ଦୁର୍ବୃତ୍ତ

ହରେକମାଲ ଦୋକାନରୁ ଲୁଟ। ଲକ୍ଷାଧିକ ଟଙ୍କା ଓ ଜିନିଷ ଲୁଟିନେଲେ ଦୁର୍ବୃତ୍ତ। ଏଭଳି ଘଟଣା ଦେଖିବାକୁ ମିଳିଛି ମୟୂରଭଞ୍ଜ ମୋରଡା ରଥଯାତ୍ରା ମେଳାରେ ।

ମୟୂରଭଞ୍ଜ: ମୋରଡ଼ା ଥାନା ଚିତ୍ରଡା ଫାଣ୍ଡି ନିକଟରୁ ଚୋରି। ରଥଯାତ୍ରା ପାଇଁ ଚିତ୍ରଡା ଜଗନ୍ନାଥ ମନ୍ଦିର ନିକଟରେ ଚାଲିଛି ମେଳା । ଗତ 4 ତାରିଖରୁ ଆରମ୍ଭ ହୋଇଅଛି ଏଠାରେ ମେଳା । ଗତକାଲି ବିଳମ୍ବିତ ରାତ୍ରିରେ ମେଳାରେ ବସିଥିବା ଅସ୍ଥାୟୀ ଦୋକାନରୁ ଲକ୍ଷାଧିକ ଟଙ୍କାର ସମ୍ପତ୍ତି ଲୁଟି ନେଇଛନ୍ତି ଦୁର୍ବୃତ୍ତ।

ମେଳାରେ 30 ରୁ ଊର୍ଦ୍ଧ୍ୱ ଦୋକାନ ବସିଥିବା ବେଳେ ଗତକାଲି ରାତିରେ 6 ଟି ଦୋକାନରୁ ଚୋରି ହୋଇଛି। ଲୁଗା ଦୋକାନ, ଲେଡିଜ ଷ୍ଟେସନାରୀ ଦୋକାନ, ହରେକମାଲ ଦୋକାନରୁ ଲୁଗା, ବିଭିନ୍ନ ହରେକମାଲ ସବୁ ଲୁଟି ନେଇଥିବା ବେଳେ ଟଙ୍କା ବାକ୍ସକୁ ବି ଲୁଟି ନେଇଛନ୍ତି ଦୁର୍ବୃତ୍ତ।

ତେବେ ଚିତ୍ରଡା ଫାଣ୍ଡିରୁ ମାତ୍ର 100 ମିଟର ଦୂରରେ ଘଟିଛି ଏହି ଘଟଣା । ଫଳରେ ଲୋକଙ୍କ ଭିତରେ ତୀବ୍ର ଅସନ୍ତୋଷ ଦେଖାଦେଇଛି। ରାତିରେ ପୋଲିସ ପେଟ୍ରୋଲିଂ କରୁଥିବା ବେଳେ ଫାଣ୍ଡି ନିକଟରୁ ଚୋରି ହେବା ପୋଲିସର ପାରିବାପଣିଆ ଉପରେ ପ୍ରଶ୍ନବାଚୀ ସୃଷ୍ଟି କରିଛି ।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ