ରାଇରଙ୍ଗପୁର :ଛାତ୍ରୀ ସାଜି ପରୀକ୍ଷା ଦେବା ଅଧ୍ୟାପିକାଙ୍କୁ ମହଙ୍ଗା ପଡ଼ିଛି । ଛାତ୍ରୀଙ୍କ ଅନୁପସ୍ଥିତିରେ ତାଙ୍କ ପାଇଁ ପରୀକ୍ଷା ଦେଇ ଶେଷରେ ଅଧ୍ୟାପିକା ଜଣକ ବନ୍ଧା ହୋଇଛନ୍ତି । ତେବେ ଅଧ୍ୟାପିକା ଜଣକ ହେଲେ ମୟୂରଭଞ୍ଜ ଜିଲ୍ଲା ରାଢୋ ସ୍ଥିତ ଲୁଇପା ଡିଗ୍ରୀ କଲେଜରେ କାର୍ଯ୍ୟରତ ଓଡ଼ିଆ ବିଭାଗର ଅଧ୍ୟାପିକା ତୁଳିକା ଆଶ । ତେବେ ଅଧ୍ୟାପିକାଙ୍କ କାରସାଦି ଧରା ପଡ଼ିବା ପରେ ଶେଷରେ ପୋଲିସ ହାତରେ ସେ ଗିରଫ ହୋଇଛନ୍ତି ।
ଛାତ୍ରୀ ସାଜି ପରୀକ୍ଷା ଦେଇ ଅଧ୍ୟାପିକା ଗିରଫ ଫେକ୍ ଛାତ୍ରୀ ସାଜି ପରୀକ୍ଷା ଦେବା କାଳ ହୋଇଛି । ଶେଷରେ ଗିରଫ ହୋଇ ଜେଲ୍ର ୪ କାନ୍ଥ ଭିତରେ ଅଛନ୍ତି ଅଧ୍ୟାପିକା । ତୁଳିକା ଓଡ଼ିଆ ବିଭାଗର ଅଧ୍ୟାପିକା ଭାବେ ଲୁଇପା ଡିଗ୍ରୀ କଲେଜରେ କାର୍ଯ୍ୟରତ ଥିଲେ । ଜଣେ ଅଧ୍ୟାପିକା ହୋଇ ମଧ୍ୟ ସେ ନିଜେ ଜଣେ ଛାତ୍ରୀ ସାଜି ପରୀକ୍ଷା ଦେବାକୁ ଆସିଥିଲେ । ପରୀକ୍ଷା ଦେବାକୁ ଛାତ୍ରୀ ଜଣକ ଅନୁପସ୍ଥିତ ରହିଥିବା ବେଳେ ସେହି ଛାତ୍ରୀଙ୍କ ଖାତାରେ ଲେଖିବା ସହିତ ମିଥ୍ୟା ପରୀକ୍ଷା ନିୟନ୍ତ୍ରକଙ୍କ ଦସ୍ତଖତ ମଧ୍ୟ କରିଥିଲେ ଅଧ୍ୟାପିକା ତୁଳିକା ଆଶ ।
ଏହା ବି ପଢନ୍ତୁ...ବୋହୂକୁ ଚେଙ୍କ ଦେବା ଅଭିଯୋଗ, ଅଧ୍ୟାପିକା ଶାଶୁଙ୍କୁ ବାନ୍ଧିଲା ପୋଲିସ
ସୂଚନା ଅନୁଯାୟୀ, ଗତ ଜୁଲାଇ ମାସ ୨୭ ତାରିଖରେ ଜୀବ ବିଜ୍ଞାନ ବିଭାଗରେ ଚତୁର୍ଥ ସେମିଷ୍ଟାର ପରୀକ୍ଷା ଚାଲିଥିଲା । ହେଲେ ଜଣେ ଛାତ୍ରୀ ପରୀକ୍ଷା ଦେବାକୁ ଆସି ପାରିନଥିଲେ । ହେଲେ ଛାତ୍ରୀଙ୍କ ଅନୁପସ୍ଥିତିରେ ଅଧ୍ୟାପିକା ତୁଳିକା ଆଶ ଉକ୍ତ ଛାତ୍ରୀଙ୍କ ଖାତାରେ ନିଜେ ଉତ୍ତର ଲେଖିଥିଲେ । ଏହା ସହିତ ସେ ସେହି ଖାତାରେ ପରୀକ୍ଷା ନିୟନ୍ତ୍ରକଙ୍କ ମିଥ୍ୟା ଦସ୍ତଖତ ମଧ୍ୟ କରାଇଥିବା ଅଭିଯୋଗ ହୋଇଛି । ଏହି ଘଟଣାକୁ କେନ୍ଦ୍ର କରି ଲୁଇପା ଡିଗ୍ରୀ କଲେଜର ଅଧ୍ୟକ୍ଷ, ତୁଳିକା ଆଶଙ୍କୁ କାରଣ ଦର୍ଶାଅ ନୋଟିସ ଜାରି କରିଥିଲେ । କାରଣ ଦର୍ଶାଅ ନୋଟିସ ପାଇବା ପରେ ଅଧ୍ୟାପିକା ତୁଳିକା କଲେଜ ଅଧ୍ୟକ୍ଷଙ୍କୁ ଗାଳି ଗୁଲଜ କରିଥିବାର ମଧ୍ୟ ଅଭିଯୋଗ ହୋଇଥିଲା ।
ତେବେ ଘଟଣା ସମ୍ପର୍କରେ କଲେଜ ଅଧ୍ୟକ୍ଷ ଉଦଳା ଥାନାରେ ଏକ ଲିଖିତ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ଉଦଳା ଥାନା ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା । ତଦନ୍ତ ପରେ ଅଭିଯୁକ୍ତ ଅଧ୍ୟାପିକା ତୁଳିକା ଆଶଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ସୂଚନା ମିଳିଛି । ତେବେ ଏହି ଘଟଣାଟି ଏବେ ସମଗ୍ର ଜିଲ୍ଲାରେ ଚର୍ଚ୍ଚାର ବିଷୟ ପାଲଟିଛି । ଛାତ୍ରୀଙ୍କ ଅନୁପସ୍ଥିତିରେ ତାଙ୍କ ବଦଳରେ ପରୀକ୍ଷା ଦେବା ସହ ମିଥ୍ୟା ଦସ୍ତଖତ କରି ବିବାଦରେ ଛନ୍ଦି ହୋି ପଡିଛନ୍ତି ଅଧ୍ୟାପିକା ତୁଳିକା ଆଶ ।
ଇଟିଭି ଭାରତ, ରାଇରଙ୍ଗପୁର
