ରାଇରଙ୍ଗପୁର: ଗୋ-ସୁରକ୍ଷାକର୍ମୀଙ୍କ ଉପରେ ଗୁଳିମାଡ଼ ପ୍ରତିବାଦରେ ସୋମବାର ଯଶିପୁରରେ ପାଞ୍ଚ ଘଣ୍ଟିଆ ବନ୍ଦ ପାଳନ । ଗୁଳିମାଡ଼ ପ୍ରତିବାଦରେ ବିଭିନ୍ନ ସଂଗଠନ ପକ୍ଷରୁ ଏହି ବନ୍ଦ ଡାକରା ଦିଆଯାଇଥିଲା । ସକାଳ ୭ ରୁ ଦିନ ୧୨ ଟା ପର୍ଯ୍ୟନ୍ତ ପାଞ୍ଚ ଘଣ୍ଟା ଯାଏଁ ଦୋକାନ ବଜାର ବନ୍ଦ ରଖାଯାଇଛି । ଏଥିସହ ଗାଡି ଚଳାଚଳ ମଧ୍ୟ ସମ୍ପୁର୍ଣ୍ଣ ଠପ୍ ରହିଛି । ବେଧଡକ ଗୋଚାଲାଣ (Cattle Smuggling) ବନ୍ଦ କରିବାକୁ ସଂଗଠନ ପକ୍ଷରୁ ଦାବି କରାଯାଇଛି ।
ତେବେ ଯଶିପୁର ଦେଇ ୪୯ ନମ୍ବର ଜାତୀୟ ରାଜପଥ ଯାଇଥିବାରୁ ଏକାଧିକ ଗାଡି ଅଟକି ରହିଥିବା ଦେଖିବାକୁ ମିଳିଛି । ଫଳରେ ସାଧାରଣ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖିନ ହେଉଛନ୍ତି । ସୂଚନା ଅନୁଯାୟୀ, ଶନିବାର ଦିନ ଗୋ-ଚାଲାଣ ନେଇ ଖବର ପାଇ ଦେବସେନାର ଗୋସୁରକ୍ଷା କର୍ମୀମାନେ ଯଶିପୁର ଥାନା ଅନ୍ତର୍ଗତ ୪୯ ନମ୍ବର ଜାତୀୟ ରାଜପଥରେ ଥିବା ବେଗନା ଟୋଲ ପ୍ଲାଜା ନିକଟରେ ଜଗି ରହିଥିଲେ । ନୀରିହ ଗୋରୁଙ୍କୁ କୋଲକାତାକୁ ଚାଲାଣ ହେଉଥିବାବେଳେ କଣ୍ଟେନରକୁ ଅଟକାଇବା ପାଇଁ ଚେଷ୍ଟା କରିଥିଲେ ଗୋସୁରକ୍ଷା କର୍ମୀ ।