ଜଳମଗ୍ନ ମୟୂରଭଞ୍ଜ, ବାହ୍ୟ ଜଗତରୁ ବିଚ୍ଛିନ୍ନ 4 ଗାଁ

ଆଜି ସକାଳୁ ମୟୂରଭଞ୍ଜ ଜିଲ୍ଲାରେ ତୁହାକୁ ତୁହା ବର୍ଷା ଲାଗି ରହିଛି । ଏଥିଯୋଗୁଁ ବିଶୋଇ ବ୍ଲକ ଅଧିନରେ ଥିବା ଚାରୋଟି ଗାଁ କୁଲଗିଡିହି, ରଙ୍ଗାମାଟିଆ, ଅସନଶିକଳ ଓ ଘୋଡାବିନ୍ଧା ସମ୍ପୁର୍ଣ୍ଣ ଭାବେ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼ିଛି ।

ରାଇରଙ୍ଗପୁର: ବଙ୍ଗୋପସାଗରରେ ପୁଣି ଲଘୁଚାପ । ଏଥିଲାଗି 24 ଘଣ୍ଟା ଯାଏଁ ନିର୍ଧୁମ ବର୍ଷା ହେବାର ସମ୍ଭାବନା ରହିଛି । ତେବେ ଏଥିରେ କନ୍ଧମାଳ ଜିଲ୍ଲା ବେଶେଷ ପ୍ରଭାବିତ ହୋଇଥିବା ବେଳେ ମଙ୍ଗଳବାର ସକାଳଠାରୁ ମୟୂରଭଞ୍ଜ ଜିଲ୍ଲାରେ ତୁହାକୁ ତୁହା ବର୍ଷା ଲାଗି ରହିଛି । ଏଥିଯୋଗୁଁ ବାହ୍ୟ ଜଗତରୁ 4ଟି ଗାଁ ବିଚ୍ଛିନ୍ନ ହୋଇଯାଇଛି ।

ସୂଚନା ଅନୁସାରେ ମୟୂରଭଞ୍ଜ ଜିଲ୍ଲା ବିଶୋଇ ବ୍ଲକ ଅଧିନରେ ଥିବା ଚାରୋଟି ଗାଁ ଯଥା କୁଲଗିଡିହି, ରଙ୍ଗାମାଟିଆ, ଅସନଶିକଳ ଓ ଘୋଡାବିନ୍ଧା ସମ୍ପୁର୍ଣ୍ଣ ଭାବେ ବାହ୍ୟ ଜଗତରୁ ବିଛିନ୍ନ ହୋଇପଡ଼ିଛି । ଆଜି ସକାଳୁ ତୁହାକୁ ତୁହା ବର୍ଷା ଯୋଗୁଁ ଏକତାଳି ଓ କୁଲଗିଡିହି ଗାଁକୁ ଯୋଗାଯୋଗ କରୁଥିବା ରାସ୍ତାର ଏକ ପୋଲ ଉପରେ ବର୍ଷା ଜଳ ପ୍ରବାହିତ ହେଉଛି । ଚାରୋଟି ଗାଁର ପ୍ରାୟ ୧୫୦୦ ଲୋକ ଏକ ପ୍ରକାର ଜଳବନ୍ଦୀ ଅବସ୍ଥାରେ ରହିଛନ୍ତି।

ସେଠାକାର ବିଦ୍ୟାଳୟର ଛାତ୍ରଛାତ୍ରୀ, ଶିକ୍ଷକ ଶିକ୍ଷୟିତ୍ରୀ ଓ ଗ୍ରାମବାସୀ ମାନେ ହନ୍ତସନ୍ତ ହେଉଥିବାର ଦେଖିବାକୁ ମିଳିଛି। ଆଜି ନଙ୍ଗଳବେଣ୍ଟା ପୋଖରିଆ ଗ୍ରାମ ପଞ୍ଚାୟତ କାର୍ଯ୍ୟାଳୟରେ ଭତ୍ତା ବଣ୍ଟନ ଥିଲା । କିନ୍ତୁ ପୋଲରେ ପ୍ରାୟ 2 ଫୁଟ ଉଚ୍ଚରେ ବର୍ଷା ଜଳ ପ୍ରବାହ ହେଉଥିବାରୁ ପଞ୍ଚାୟତ କାର୍ଯ୍ୟାଳୟକୁ ଯାଇନପାରି ଗାଁଲୋକେ ସେସବୁ ସୁବିଧାରୁ ବଞ୍ଚିତ ହୋଇଛନ୍ତି ।

ବିଗତ ଦିନରେ ପ୍ରଧାନମନ୍ତ୍ରୀ ସଡକ ନିର୍ମାଣ ଓ ସମ୍ପ୍ରସାରଣ ସମୟରେ ଗ୍ରାମବାସୀ ଉଚ୍ଚପୋଲର ନିର୍ମାଣ ପାଇଁ ବାରମ୍ବାର ବିଭାଗୀୟ ଅଧିକାରୀଙ୍କୁ ଜଣାଇଥିଲେ । ଏହା ସତ୍ତ୍ବେ ବି ତାଙ୍କ ଦାବିକୁ ଅଣଦେଖା କରାଯାଇଥିଲା । ତେଣୁ ଆଜି ବିପଦକୁ ମୁଣ୍ଡେଇ ଏହି ପୋଲରେ ଯିବା ଆସିବା କରିବାକୁ ବାଧ୍ୟ ହେଉଛନ୍ତି ଗ୍ରାମବାସୀ।

ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ