ରାଇରଙ୍ଗପୁର:ମୟୂରଭଞ୍ଜ ଜିଲ୍ଲା ଯଶିପୁରରେ ଗୋ ସୁରକ୍ଷାକର୍ମୀଙ୍କ ଉପରେ ଗୁଳି ମାଡ଼ ଘଟଣା । ଏହି ଘଟଣାରେ ପୋଲିସ ୧୧ ଜଣ ଗୋ ମାଫିଆଙ୍କୁ ଗିରଫ କରିବା ସହିତ ୩ଟି ଗାଡି ଓ ମାରଣାସ୍ତ୍ର ଜବତ କରିଛି ।
ଗୋ-ସୁରକ୍ଷାକର୍ମୀଙ୍କୁ ଗୁଳିମାଡ ଘଟଣା;୧୧ ଗୋ ମାଫିଆଙ୍କୁ ଗିରଫ,୩ଟି ଗାଡି ସହ ମାରଣାସ୍ତ୍ର ଜବତ ସୂଚନା ଅନୁଯାୟୀ, ଗୋ ଚାଲାଣ ହେଉଥିବା ଖବର ପାଇ ଆଜି(ଶନିବାର) ସକାଳେ ଦେବସେନାର ଗୋ ସୁରକ୍ଷା କର୍ମୀମାନେ ଯଶିପୁର ଥାନା ଅନ୍ତର୍ଗତ 49 ନମ୍ବର ଜାତୀୟ ରାଜପଥରେ ଥିବା ବେଗନା ଟୋଲ ପ୍ଲାଜା ନିକଟରେ ଜଗି ରହିଥିଲେ । ତେବେ କଲିକତାକୁ ଚାଲାଣ ହେଉଥିବା ଗୋ ବୋଝେଇ କଣ୍ଟେନରକୁ ଅଟକାଇବା ପାଇଁ ଚେଷ୍ଟା କରୁଥିବା ବେଳେ ସେଠାରେ ଉଭୟ ପକ୍ଷରୁ ପାଟିତୁଣ୍ଡ ହୋଇଥିଲା । ତେବେ ଗଣ୍ତଗୋଳ ଏତେ ଉଗ୍ର ହୋଇଥିଲା ଶେଷରେ ଗୋ ମାଫିଆମାନେ ଅତର୍କିତ ଭାବେ ଗୁଳି ଚଳାଇ ଥିଲେ।
ଏଥିରେ ଦୁଇ ଗୋ ସୁରକ୍ଷାକର୍ମୀ ଗୁରୁତର ଭାବେ ଆହତ ହୋଇଥିଲେ । ସେଠାରୁ କିଛି ଗୋ ବୋଝେଇ କଣ୍ଟେନରକୁ ମାଫିଆମାନେ ନେଇଯାଇଥିବା ବେଳେ ଅନ୍ୟ ଗୋଟିଏ କଣ୍ଟେନର ରହି ଯାଇଥିଲା । ସେପଟେ ଅନ୍ୟ ୩ଟି ଗାଡ଼ିରେ ଦୁର୍ବୃତ୍ତ ମାନେ ଗୁଳିକାଣ୍ଡ କରି ଫେରାର ହୋଇଯାଇଥିଲେ । ଆହତ ୨ ଗୋ-ସୁରକ୍ଷା କର୍ମୀ ଦୀପକ ସାହୁ ଓ ଗୁଡୁ ବେହେରାଙ୍କୁ ଉଦ୍ଧାର କରାଯାଇ ଯଶିପୁର ମେଡିକାଲକୁ ଅଣା ଯାଇଥିଲା ।
ଜଣଙ୍କର ଗୋଡ଼ରେ ଗୁଳି ବାଜିଥିବା ବେଳେ ଅନ୍ୟ ଜଣଙ୍କର ହାତରେ ଗୁଳି ବାଜିଥିବା ଜଣାଯାଇଛି । ଉଭୟଙ୍କ ସ୍ବାସ୍ଥ୍ୟବସ୍ଥା ସଙ୍କଟାପନ୍ନ ଥିବାରୁ ବାରିପଦା ପିଆରଏମ ସ୍ଥାନାନ୍ତର କରାଯାଇଥିବା ସୂଚନା ମିଳିଛି । ସେପଟେ ଯଶିପୁର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଘଟଣାର ଛାନଭିନ ଆରମ୍ଭ କରିଛି । କରଞ୍ଜିଆ SDPOଙ୍କ ତତ୍ବାଧାନରେ ଯଶିପୁର ପୋଲିସ ମାଫିଆଙ୍କୁ ଧରିବା ପାଇଁ ବିଭିନ୍ନ ସ୍ଥାନରେ ଚଢାଉ କରିଥିଲା । ଚଢାଉ ସମୟରେ ୧୧ ଜଣଙ୍କୁ ଗିରଫ କରିବା ସହ ୩ଟି ଗାଡି ମଧ୍ୟ ଜବତ ହୋଇଛି ।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
