ରାଇରଙ୍ଗପୁର: ମୟୂରଭଞ୍ଜ ଜିଲ୍ଲା ତିରିଂ ଥାନା ଅନ୍ତର୍ଗତ ତିରିଂ ଲ୍ୟାମ୍ପ କାର୍ଯ୍ୟାଳୟରେ ବିଭିନ୍ନ ଗ୍ରାମର ଅସନ୍ତୁଷ୍ଟ ଚାଷୀ ଏକତ୍ରିତ ହୋଇ ଲ୍ୟାମ୍ପସ କାର୍ଯ୍ୟାଳୟ ଘେରାଉ କରିଛନ୍ତି । ବିଭିନ୍ନ ଦୁର୍ନୀତି ଅଭିଯୋଗରେ ଚାଷୀମାନେ ଏଠାରେ ବିକ୍ଷୋଭ ପ୍ରଦର୍ଶନ କରିବା ସହ ବିଭାଗୀୟ ଉଚ୍ଚ ପଦସ୍ଥ ଅଧିକାରୀ ଏବଂ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଦାବିପତ୍ର ପ୍ରଦାନ କରିଛନ୍ତି । ତିରିଂ ବ୍ଲକ ଅଞ୍ଚଳର ଚାଷୀମାନେ ସମବାୟ ସମିତି ବ୍ୟାଙ୍କରୁ କୃଷି ଋଣ ନେଇଥିବା ବେଳେ ସେମାନଙ୍କୁ ଋଣ ଖାତା ପ୍ରଦାନ କରାଯାଉନଥିବା ଅଭିଯୋଗ ହୋଇଛି । ଯାହାଫଳରେ ସେମାନେ ଋଣର ସବିଶେଷ ବିବରଣୀ ଜାଣି ପାରୁନାହାନ୍ତି ।
ଏପରିକି ଚାଷୀମାନେ ଆହୁରିମଧ୍ୟ ଅଭିଯୋଗ କରିଛନ୍ତି ଯେ, ଋଣ ନବୀକରଣ କରିବାକୁ ଗଲେ ଅଧିକାରୀମାନେ ୧୦ରୁ ୨୦ ପ୍ରତିଶତ ଟଙ୍କା କମିଶନ ବା ଲାଞ୍ଚ ମାଗୁଛନ୍ତି । କମିଶନ ନଦେଲେ ଋଣ ପ୍ରଦାନ ନକରିବା ସହ ଉର୍ବରକ ସାର କିମ୍ବା ବିହନ ମଧ୍ୟ ଦେଉନାହାନ୍ତି । ତିରିଂ ସମବାୟ ସମିତି(ଲ୍ୟାମ୍ପସ) ଏମଡି କ୍ଷୀରୋଦ ଚନ୍ଦ୍ର ଧଳ କିଛି ଚାଷୀଙ୍କ ଋଣ ଖାତା ନିଜ ପାଖରେ ରଖିଥିବା ବେଳେ ବିଆଇସି ମୋହନ ଚରଣ ଲାହୋର ଆଉ କିଛି ଚାଷୀଙ୍କ ଖାତା ରଖିଛନ୍ତି ।
ବିଆଇସି ଉକ୍ତ ଖାତାଧାରକ ଚାଷୀଙ୍କ ଠାରୁ ୨୦ ପ୍ରତିଶତ ଓ ଏମଡି ୧୦ ପ୍ରତିଶତ କମିଶନ ମାଗୁଥିବା ଅଭିଯୋଗ ହୋଇଛି । କମିଶନ ଟଙ୍କା ମାଗିବା ପାଇଁ ସେ ପ୍ରଦୀପ ନାମକ ଜଣେ ଅନୁଗତଙ୍କୁ ପଠାଇଥାନ୍ତି । ଟଙ୍କା ନଦେଲେ ଲ୍ୟାମ୍ପରୁ ଖାତା କାଟି ଦିଆଯିବ ଏବଂ ଉର୍ବରକ ସାର କିମ୍ବା ବିହନ ଦିଆଯିବ ନାହିଁ ବୋଲି ଧମକ ଦେଇ ବାଧ୍ୟ କରାଯାଉଛି । ଋଣ ଖାତା ମାଗିରେ ମଧ୍ୟ ଦିଆଯାଉ ନାହିଁ ।
ଚାଷୀମାନେ ବ୍ୟାଙ୍କ ଯିବା ପରେ ତାଙ୍କ ନାମରେ ୬୦ରୁ ୭୦ ହଜାର ଟଙ୍କା ଋଣ ଥିବା ଜାଣିବାକୁ ପାଇଥିଲେ । ହେଲେ ଚାଷୀ ୧୦ ହଜାର ଟଙ୍କାରୁ ଅଧିକ ଋଣ ନେଇନଥିବା କହିଛନ୍ତି । ଏ ସମ୍ପର୍କରେ ପଚାରି ବୁଝିଲେ ସେମାନଙ୍କୁ ଦୁର୍ବ୍ୟବହାର କରି ଲ୍ୟାମ୍ପରୁ ତଡି ଦିଆଯାଉଥିବା ଅଭିଯୋଗ ହୋଇଛି । ଏନେଇ ଏମସିସି ବ୍ୟାଙ୍କ ପ୍ରବନ୍ଧକଙ୍କ ନିକଟରେ ଅଭିଯୋଗ କରାଯାଇଥିବା ମଧ୍ୟ କୌଣସି ଲାଭ ହୋଇନଥିଲା ।