ରାଇରଙ୍ଗପୁର: କରଞ୍ଜିଆ ବନଖଣ୍ଡ ଅଞ୍ଚଳରେ ପୁଣି ହାତୀ ଆତଙ୍କ । 2ଟି ଘର ଭାଙ୍ଗିବା ସହ ନଷ୍ଟ କଲେ ପରିବା ଚାଷ । ଏହାସହ କଲନ୍ଦା ଗ୍ରାମରେ ବ୍ୟାପକ ପରିବା ଚାଷ ଦଳି ଚକଟି ନଷ୍ଟ କରିବା ସହ ପରିବା ଖାଇ ଯାଇଛନ୍ତି ହାତୀପଲ।
ଗତ ଦୁଇଦିନ ମଧ୍ୟରେ ଏହି ହାତୀପଲ ୮ ଟି ଘର ଭାଙ୍ଗିଥିବା ଜଣାପଡିଛି । ଗତ କିଛିଦିନ ହେବ ମୟୁରଭଞ୍ଜ କରଞ୍ଜିଆ ବନଖଣ୍ଡ ଅଞ୍ଚଳର ବିଭିନ୍ନ ଗ୍ରାମରେ ହାତୀପଲଙ୍କ ଆତଙ୍କ ବଢି ବଢି ଚାଲିଛି ।
ତେବେ ଗତକାଲି(ସୋମବାର) ବିଳମ୍ବିତ ରାତିରେ କରଞ୍ଜିଆ ବନଖଣ୍ଡ ଶୁକୃଳି ବ୍ଲକ ଅଧିନରେ ଥିବା ପଣଶି ଗାଁରେ ପଶି ୧୭ ଟିକିଆ ହାତୀପଲ ବ୍ୟାପକ ଧାନ ଖାଇବା ସହ ୨ ଟି ଘର ଭାଙ୍ଗିଥିବା ଜଣାପଡିଛି । ଏହାସହ ଘରେ ଲାଗିଥିବା ଲୁହା ଗ୍ରୀଲକୁ ହାତୀ ଭାଙ୍ଗି ଦେଇଥିବା ସୂଚନା ମିଳିଛି ।
ଖାଦ୍ୟ ଅନ୍ବେଷଣରେ ଆସି ଏହି ହାତୀପଲ ଘରମାବେଡା ସଂରକ୍ଷିତ ଜଙ୍ଗଲରେ ଥୁବା ଜଣାପଡ଼ିଛି । ଗତ ୨୪ଦିନ ମଧ୍ୟରେ ହାତୀପଲ କରଞ୍ଜିଆ ଅଞ୍ଚଳର ବିଭିନ୍ନ ଗ୍ରାମରେ ପଶି ଏକର ଏକର ଧାନ ଫସଲ ନଷ୍ଟ କରିବା ସହିତ ୨ ଜଣଙ୍କୁ ମାରିଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇଛନ୍ତି । ସେହିପରି ୨୫ ଟିରୁ ଅଧିକ ଘର ମଧ୍ୟ ଭାଙ୍ଗିଥିବା ବନବିଭାଗ ପକ୍ଷରୁ ସୂଚନା ରହିଥିବାବେଳେ ବନ ବିଭାଗ ହାତୀ ଦାଉରୁ ଲୋକଙ୍କୁ ସୁରକ୍ଷା ଦେଇ ପାରୁ ନଥିବା ଲୋକେ ଅଭିଯୋଗ କରିଛନ୍ତି ।
ରାଇରଙ୍ପୁରରୁ ସଞ୍ଜୟ ପରିଡା, ଇଟିଭି ଭାରତ
