ନିଶାସକ୍ତ ଅବସ୍ଥାରେ କନେଷ୍ଟବଳଙ୍କ ଭିଡିଓ ଭାଇରାଲ, ନିଲମ୍ବିତ କଲେ ଏସପି

ନିଲମ୍ବିତ ହେବା ସହ ଜେଲ ଗଲେ ହିରୋଗିରି କରୁଥିବା କନେଷ୍ଟବଳ । ବଡ଼ସାହି ହିଙ୍ଗୁଳା ମେଳାରେ ହିରୋଗିରିର ଭିଡ଼ିଓ ଭାଇରାଲ ପରେ କାର୍ଯ୍ୟାନୁଷ୍ଠାନ ଗ୍ରହଣ କଲେ ଏସପି । ଅଧିକ ପଢନ୍ତୁ...

ବାରିପଦା: ନିଲମ୍ବିତ ହେବା ସହ ଜେଲ ଗଲେ ନିଶାସକ୍ତ ଅବସ୍ଥାରେ ହିରୋଗିରି କରୁଥିବା କନେଷ୍ଟବଳ ଗଗନ ବିହାରୀ ନାଏକ । ମୟୂରଭଞ୍ଜ ଜିଲ୍ଲା ବଡ଼ସାହି ହିଙ୍ଗୁଳା ମେଳାରେ ନିଶାସକ୍ତ ଅବସ୍ଥାରେ କନେଷ୍ଟବଳ ଜଣଙ୍କ ଭକ୍ତଙ୍କୁ ଗାଳିଗୁଲଜ କରିବା ସହ ବିଶୃଙ୍ଖଳିତ ଆଚରଣ କରୁଥିବାର ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଥିଲା । ଯାହାକୁ ଦେଖି କାର୍ଯ୍ୟାନୁଷ୍ଠାନ ଗ୍ରହଣ କରିଛନ୍ତି ଏସପି ।

କନେଷ୍ଟବଳ ଗଗନଙ୍କ ଘର ବାରିପଦା ରିଜର୍ଭ ମୟୂରଭଞ୍ଜ ଜିଲ୍ଲା ରରୁଆଁ ଥାନା ଅନ୍ତର୍ଗତ ଦେଉଳି ଗ୍ରାମରେ । ତେବେ ନିଶାସକ୍ତ ଭିଡିଓ ଭାଇରାଲ ହେବା ପରେ ଏସପି ପରମାର ସ୍ମିଥ ପୁରୁଷୋତ୍ତମ ଦାସଙ୍କ ନିର୍ଦ୍ଦେଶ କ୍ରମେ ଜିଲ୍ଲା ଆରକ୍ଷୀ ଅଧିକ୍ଷକଙ୍କ କାର୍ଯ୍ୟାଳୟ ପତ୍ର ସଂଖ୍ୟା 17/14.02.2020 ଅନୁସାରେ ବଡ଼ସାହି ଥାନା ଅଧିକାରୀ ଜୟନ୍ତ କୁମାର ବେହେରା ଗଗନଙ୍କୁ କାର୍ଯ୍ୟରୁ ନିଲମ୍ବନ କରିଥିଲେ ।

ଏଥିସହ ବଡ଼ସାହି ଥାନାରେ ଗଗନଙ୍କ ନାମରେ କେସ ନମ୍ବର 21/2020 ଆଇପିସି ଧାରା 341, 294, 363, 510, 526, 298, 323, 183ରେ ମାମଲା ରୁଜୁ କରାଯାଇଛି । ଏହି ଆଧାରରେ ଅଭିଯୁକ୍ତ ଗଗନ ବିହାରୀଙ୍କୁ ଗିରଫ ପରେ କୋର୍ଟ ଚାଲାଣ କରାଯାଇଛି । ସେପଟେ କୋର୍ଟରେ କନେଷ୍ଟବଳଙ୍କ ଜାମିନ ନାମଞ୍ଜୁର ହେବା ପରେ ତାଙ୍କୁ ମଣ୍ଡଳ କାରାଗାରକୁ ପଠାଇ ଦିଆଯାଇଛି ।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ