ଘାଟିରୁ 100 ଫୁଟ ତଳକୁ ଖସିଲା ସୂତା ବୋଝେଇ ଟ୍ରକ, ଡ୍ରାଇଭର ମୃତ

ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଥାନା ଦ୍ଵାରଶୁଣି ଘାଟିର 49 ନମ୍ବର ଜାତୀୟ ରାଜପଥରେ ପୁଣି ଦୁର୍ଘଟଣା।

ମୟୂରଭଞ୍ଜ: ମରଣଯନ୍ତା ପାଲଟିଛି ଦ୍ଵାରଶୁଣି ଘାଟି । ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ଥାନା ଦ୍ଵାରଶୁଣି ଘାଟିର 49 ନମ୍ବର ଜାତୀୟ ରାଜପଥରେ ପୁଣି ଦୁର୍ଘଟଣା । ଘଟଣାରେ ଡ୍ରାଇଭରର ମୃତ୍ୟୁ ହୋଇଥିବାବେଳେ ହେଲପର ଗୁରୁତର ଆହତ ହୋଇଛନ୍ତି।

ସୂଚନା ଅନୁସାରେ, ରବିବାର ବିଳମ୍ବିତ ରାତ୍ରିରେ କେଉଁଝର ପଟୁ କୋଲକତା ଅଭିମୁଖେ ଯାଉଥିବା ଏକ ସୂତା ବୋଝେଇ ଟ୍ରକ ଭାରସାମ୍ୟ ହରାଇ ଘାଟିରୁ ତଳକୁ ଖସି ପଡିଛି । ଘାଟିର ପ୍ରାୟ 100 ଫୁଟ ତଳକୁ ଖସି ପଡିବା ପରେ ଟ୍ରକଟି ଭାଙ୍ଗି ଚୁରମାର ହୋଇଯାଇଛି ।

ଦୁର୍ଘଟଣା ଏତେ ଭୟଙ୍କର ଥିଲା ଯେ, ମୃତ ଡ୍ରାଇଭରକୁ ଉଦ୍ଧାର କରିବାକୁ ଆସିଥିବା ଅଗ୍ନିଶମ ବିଭାଗ କର୍ମଚାରୀଙ୍କୁ ପ୍ରାୟ 5 ଘଣ୍ଟାରୁ ଊର୍ଦ୍ଧ୍ବ ସମୟ କସରତ କରିବାକୁ ପଡିଥିଲା । ତେବେ ବାଙ୍ଗିରିପୋଷି ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ମା ଦ୍ଵାରଶୁଣିଙ୍କ ଘାଟିରେ ପ୍ରତ୍ୟେକ ଦିନ ଦୁର୍ଘଟଣା ଘଟୁଥିବାବେଳେ ପ୍ରଶାସନର ନିଘା ନଥିବା ସାଧାରଣରେ ଅଭିଯୋଗ ହୋଇଛି ।

ମୟୂରଭଞ୍ଜରୁ ମୃତ୍ୟୁଞ୍ଜୟ ସେନାପତି, ଇଟିଭି ଭାରତ