ବାରିପଦା: ଶହୀଦ ସବ-ଇନ୍ସପେକ୍ଟର ଦୟାନିଧି ଦାସଙ୍କ ମର ଶରୀରକୁ ଦିଆଯାଇଛି ଗାର୍ଡ ଅଫ୍ ଅନର । ବାରିପଦା ସ୍ଥିତ ରିଜର୍ଭ ଅଫିସ ପରିସରରେ ମୟୂରଭଞ୍ଜ ଜିଲ୍ଲା ପୋଲିସ ପକ୍ଷରୁ ଏହି ଗାର୍ଡ ଅଫ୍ ଅନର ଦିଆଯାଇଛି । ଏହି ଅବସରରେ ଉତ୍ତରାଞ୍ଚଳ ଆଇଜି ଦୀପ୍ତେଶ ପଟ୍ଟନାୟକ, ମୟୂରଭଞ୍ଜ ଏସପି ପରମାର ସ୍ମିଥ ପୁରୁଷୋତ୍ତମ ଦାସ, ଓଡିଶା କୃଷି ନିଗମର ଅଧ୍ୟକ୍ଷ ଦେବାଶିଷ ମହାନ୍ତି, ଜିଲ୍ଲା ଓକିଲ ସଂଘର ଆଇନଜୀବୀ, ବାରିପଦା ଆଇନ ମହାବିଦ୍ୟାଳୟର ଛାତ୍ରଛାତ୍ରୀମାନେ ଯୋଗ ଦେଇ ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ । ଓଡିଶା ପୋଲିସ ପକ୍ଷରୁ ଶହୀଦଙ୍କ ପରିବାରକୁ 50 ହଜାର ଟଙ୍କା ଏବଂ ମୟୂରଭଞ୍ଜ ଜିଲ୍ଲା ରେଡ଼କ୍ରସ ପାଣ୍ଠିରୁ 10 ହଜାର ଟଙ୍କା ପ୍ରଦାନ କରାଯାଇଛି ।
ସୂଚନାଯୋଗ୍ୟ, ସୋମବାର ବାରିପଦା ତକତପୁର ଉତ୍ତର-ଓଡିଶା ବିଶ୍ବବିଦ୍ୟାଳୟ ରାସ୍ତାରେ ମଦୁଆ ଗାଡି ଚାଳକକୁ ଧରିବା ପାଇଁ ଚେକିଂ ଚାଲିଥିଲା । ସବ୍-ଇନ୍ସପେକ୍ଟର ଦୟାନିଧି ଦାସ ମଧ୍ୟ ଏଥିରେ ସାମିଲ ଥିଲେ । ଏହି ସମୟରେ ଦୟାନିଧି ଚେକିଂ ପାଇଁ ଏକ ମୋଟର ସାଇକେଲ ଆରୋହୀଙ୍କ ଗାଡିକୁ ଅଟକାଇବାକୁ ଚେଷ୍ଟା କରିଥିଲେ । ମାତ୍ର ମୋଟର ସାଇକେଲ ଚାଳକ ଅଟକିବା ପରିବର୍ତ୍ତେ ତାଙ୍କୁ ଧକ୍କା ଦେଇ ଖସିବାକୁ ଚେଷ୍ଟା କରିଥିଲା । ଯେଉଁଥିରେ ସେ ଗୁରୁତର ଆହତ ହୋଇଥିଲେ । ଚିକିତ୍ସା ପାଇଁ ତାଙ୍କୁ ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଥିବାବେଳେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।