ବାରିପଦା: ବୁଦାମୂଳରୁ ମିଳିଲା ବୃଦ୍ଧାଙ୍କ ଗଳିତ ମୃତଦେହ । ମୟୂରଭଞ୍ଜ ଜିଲ୍ଲା ବାରିପଦା ଟାଉନ ଥାନା ଅନ୍ତର୍ଗତ କଚେରୀ ପରିବା ବଜାର ଅଞ୍ଚଳରୁ ଏହି ଘଟଣା ସାମ୍ନାକୁ ଆସିଛି । ବଜାର ନିକଟରେ ଏକ ପୋଖରୀ କଡରେ ଥିବା ବୁଦା ଭିତରୁ ଜଣେ ବୃଦ୍ଧଙ୍କ ମୃତଦେହ ଉଦ୍ଧାର ହୋଇଛି । ମୃତଦେହଟି ସଢି ଯାଇଥିବା ବେଳେ ମୃତ୍ୟୁର କାରଣ ଅସ୍ପଷ୍ଟ ଅଛି । ଏମିତିକି ମୃତକଙ୍କ ପରିଚୟ ମଧ୍ୟ ଜଣାପଡିନି ।
ସୂଚନା ଅନୁଯାୟୀ, ଶନିବାର ଅପରାହ୍ନ ପାଖାପାଖି ୧୧ଟା ସମୟରେ ଝିଞ୍ଜିରି ପୋଖରୀ ନିକଟସ୍ଥ ପରିବା ମାର୍କେଟରେ ଦୁର୍ଗନ୍ଧ ଆସିବାରୁ ସ୍ଥାନୀୟ ଲୋକେ ଘଟଣା ସମ୍ପର୍କରେ ଜାଣିବା ପାଇଁ ଆଖପାଖ ସ୍ଥାନରେ ଖୋଜାଖୋଜି କରିଥିଲେ । ତେବେ ବହୁତ ଖୋଜାଖୋଜି କରିବା ପରେ ପୋଖରୀ କଡ଼ରେ ଥିବା ବୁଦା ଭିତରେ ଏକ ଗଳିତ ମୃତଦେହ ପଡିଥିବା ଦେଖିବାକୁ ପାଇଥିଲେ । ପରେ ଘଟଣା ସମ୍ପର୍କରେ ବାରିପଦା ଟାଉନ ଥାନା ପୋଲିସକୁ ଖବର ଦେଇଥିଲେ ସ୍ଥାନୀୟ ଲୋକେ । ଖବର ପାଇ ବାରିପଦା ଟାଉନ ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିଲେ । ଅଧିକ ତଦନ୍ତ ପାଇଁ ବାରିପଦା ସ୍ଥିତ ସାଇଣ୍ଟିଫିକ ଟିମକୁ ଡ଼କାଇ ଥିଲେ । ଏହାପରେ ବୃଦ୍ଧଙ୍କ ମୃତଦେହକୁ ଉଦ୍ଧାର କରାଯିବା ସହିତ ବ୍ୟବଚ୍ଛେଦ ପାଇଁ ବାରିପଦା ପିଆରଏମ ମେଡିକାଲକୁ ପଠା ଯାଇଥିଲା ।