ରାଇରଙ୍ଗପୁର : ଗଣମାଧ୍ୟମ ପ୍ରତିନିଧି ଓ କଲେଜ କର୍ତ୍ତୁପକ୍ଷଙ୍କ ମଧ୍ୟରେ ଠେଲାପେଲା ଓ ମାରପିଟ୍ । ଏପରି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲ୍ଲା ବହଳଦା ଥାନା ଅଧୀନରେ ଥିବା ଲୋକନାଥପୁରର ଅମରାବତୀ ପୋଲି ଟେକନିକ୍ କଲେଜରେ ।
ସୂଚନା ଅନୁଯାୟୀ, ଖବର ସଂଗ୍ରହ କରିବା ପାଇଁ ତିନି ଜଣ ବୈଦୁତିକ ଗଣମାଧ୍ୟମ ପ୍ରତିନିଧି ଓ ଜଣେ କ୍ୟାମେରାମ୍ୟାନ୍ ଉକ୍ତ କଲେଜକୁ ଯାଇଥିଲେ। ତେବେ ସେଠାରେ କୌଣସି କାରଣରୁ କଲେଜ କର୍ତ୍ତୁପକ୍ଷ ଓ ବୈଦୁତିକ ଗଣମାଧ୍ୟମ ପ୍ରତିନିଧିଙ୍କ ମଧ୍ୟରେ ଠେଲାପେଲା, ମାରପିଟ୍, ଟଣାଓଟରା, ହତ୍ୟା ଧମକ, ଗାଳିଗୁଲଜ ହୋଇଥିଲା । ଏପରିକି ଗଣମାଧ୍ୟମ ପ୍ରତିନିଧିଙ୍କ ବୁମ୍ ଛଡେଇ ନେଇ ଭାଙ୍ଗି ଦେବା ଭଳି ଅଭାବନୀୟ ଘଟଣା ଘଟିଥିବା ସୂଚନା ମିଳିଛି।
ଗଣମାଧ୍ୟମ ପ୍ରତିନିଧି ଓ କଲେଜ କର୍ତ୍ତୁପକ୍ଷଙ୍କ ମଧ୍ୟରେ ଗଣ୍ଡଗୋଳ: ମାମଲା ରୁଜୁ କଲେଜ କର୍ତ୍ତୁପକ୍ଷ କମଳେନ୍ଦୁ ମହାନ୍ତଙ୍କ ସ୍ତ୍ରୀଙ୍କ ଅଭିଯୋଗ କ୍ରମେ ବୈଦୁତିକ ଗଣମାଧ୍ୟମ ପ୍ରତିନିଧିମାନେ ପରିକ୍ଷା ଚାଲୁଥିବା ସମୟରେ ନିଜ ପରିଚୟ ନଦେଇ ପରୀକ୍ଷା ହଲ୍ରେ ପଶିବା ସହ ଭିଡିଓ ସୁଟିଂ କରିଥିଲେ । ସେମାନଙ୍କୁ ଏନେଇ ପଚାରିବାରୁ ସେମାନେ କଲେଜ କର୍ତ୍ତୁପକ୍ଷଙ୍କୁ ଟଣାଓଟରା, ଗାଳିଗୁଲଜ, ଧକ୍କା ମାରିବା ସହ ଧମକଚମକ ଦେଇଥିଲେ । ଏନେଇ ବହଳଦା ଥାନାରେ ତିନି ଜଣ ଗଣମାଧ୍ୟମ ପ୍ରତିନିଧି ଓ କ୍ୟାମେରାମ୍ୟାନଙ୍କ ନାଁରେ ଲିଖିତ ଅଭିଯୋଗ କରିଛନ୍ତି କଲେଜ କର୍ତ୍ତୁପକ୍ଷ ।
ଅନ୍ୟପଟେ ବୈଦୁତିକ ଗଣମାଧ୍ୟମ ପ୍ରତିନିଧି ଖବର ସଂଗ୍ରହ ପାଇଁ କଲେଜ ଯାଇଥିବା ବେଳେ କଲେଜ କର୍ତ୍ତୁପକ୍ଷ ସେମାନଙ୍କୁ ଧକ୍କା, ମାରପିଟ୍ ଧମକଚମକ ଓ ବୁମ୍ ଭାଙ୍ଗି ଦେବା ନେଇ ବହଳଦା ଥାନାରେ ଲିଖିତ ଅଭିଯୋଗ କରିଥିବା ବହଳଦା ଥାନା ଅଧିକାରୀ ସୂଚନା ଦେଇଛନ୍ତି। ଏନେଇ ବହଳଦା ଥାନା ଅଧିକାରୀ ଘଟଣାର ତଦନ୍ତ ଜାରି ରଖିଥିବା ଜଣାପଡିଛି।
ରାଇରଙ୍ଗପୁରରୁ ସଞ୍ଜୟ ପରିଡା, ଇଟିଭି ଭାରତ
