ରାଇରଙ୍ଗପୁର: ଆରଆଇଙ୍କୁ ପଥର ମାଫିଆମାନେ ମରଣାନ୍ତକ ଆକ୍ରମଣ କରିଥିବା ଅଭିଯୋଗ ହୋଇଛି। ଏହି ଘଟଣାରେ ଆରଆଇଙ୍କ ମୁଣ୍ଡ ଫାଟି ଯାଇଥିବାବେଳେ ୬ ଜଣ ପଥର ମାଫିଆଙ୍କ ନାଁରେ ଥାନାରେ ଅଭିଯୋଗ ହୋଇଛି। ତେବେ ମୟୂରଭଞ୍ଜ ଜିଲ୍ଲା ଖୁଣ୍ଟା ଥାନା ଅନ୍ତର୍ଗତ ସୁବର୍ଣ୍ଣମଞ୍ଜରୀ ଅଞ୍ଚଳରେ ଏପରି ଏକ ଅଭାବନୀୟ ଘଟଣା ଘଟିଯାଇଛି। ଖୁଣ୍ଟା ତହସିଲ ଅନ୍ତର୍ଗତ ସୁବର୍ଣ୍ଣମଞ୍ଜରୀ ଅଞ୍ଚଳରେ ବେଆଇନ ପଥର କାରବାର ହେଉଥିବାର ଖବର ପାଇ ଆଜି ଭୋରରୁ ଖୁଣ୍ଟା ତହସିଲର ବଡପଥରା ଆରଆଇ ଦୟାନିଧି ରାଉତ ଘଟଣାସ୍ଥଳକୁ ଯାଉଥିଲେ। ସେହି ସମୟରେ ସପଞ୍ଚୁଆ ଫରେଷ୍ଟ ବିଟ୍ ନିକଟରେ ଆରଆଇଙ୍କୁ ପଥର ମାଫିଆମାନେ ଆକ୍ରମଣ କରିଥିଲେ। ଫଳରେ ଆରଆଇଙ୍କ ମୁଣ୍ଡ ଫାଟିଯାଇଥିବାବେଳେ ସେ ଲହୁଲୁହାଣ ହୋଇଥିଲେ । ଏ ସମ୍ପର୍କରେ ଆରଆଇ ଜଣକ ଖୁଣ୍ଟା ତହସିଲଦାରଙ୍କୁ ଖବର ଦେବାରୁ ତହସିଲଦାର ଅଙ୍କୁର ଅଭିଳାଷ ଘଟଣାସ୍ଥଳରେ ପହଞ୍ଚି ତାଙ୍କୁ ଉଦ୍ଧାର କରିଥିଲେ।
ଏହାସହିତ ଆହତ ଆରଆଇଙ୍କୁ ଚିକିତ୍ସା ନିମନ୍ତେ ତାଙ୍କୁ ଡୁକୁରା ମେଡିକାଲରେ ଭର୍ତ୍ତି କରାଯାଇଥିଲା। ପରେ ଘଟଣାକୁ ନେଇ ଖୁଣ୍ଟା ଥାନାରେ ଅଭିଯୋଗ ହୋଇଥିଲା। ୬ ଜଣ ମାଫିଆ ମରଣାନ୍ତକ ଆକ୍ରମଣ କରିବା ସହିତ ବାଇକ ଓ ମୋବାଇଲ ଛଡେଇ ନେଇଥିବା ଅଭିଯୋଗ କରିଛନ୍ତି ଆରଆଇ। ଅଭିଯୋଗ ପାଇବା ପରେ ଖୁଣ୍ଟା ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିଛି। ଆକ୍ରମଣ କରିଥିବା ପଥର ମାଫିଆମାନେ ହେଲେ ଖୁଣ୍ଟା ଥାନା ଡୁକୁରା ଗ୍ରାମର ଅରବିନ୍ଦ କୁମାର ସାହୁ, ସପଞ୍ଚୁଆ ଗ୍ରାମର ସମୀର ହେମ୍ବ୍ରମ, କୁଶଗଡିଆ ଗ୍ରାମର ଚାନ୍ଦ୍ରାୟ ସୋରେନ ଓ ବିଜୟ କୁମାର ନାଏକ ଏବଂ ଅନ୍ୟ 2 ଜଣଙ୍କ ନାମ ଜାଣି ନଥିବା ଏତଲାରେ ଦର୍ଶାଯାଇଛି। ତେବେ ସମସ୍ତ ଅଭିଯୁକ୍ତ ଫେରାର ଥିବା ପୋଲିସ ପକ୍ଷରୁ ସୂଚନା ମିଳିଛି।