ବାରିପଦା: ଝଡି ବର୍ଷାରେ ଅଧାରେ ଲିଭି ଯାଉଛି ଚୁଲି। ଘର ଭିତରୁ ପ୍ଲାଷ୍ଟର ଖସୁଥିବାରୁ ପିଲାଙ୍କୁ ନେବାକୁ ଭୟ ଲାଗୁଛି। ଏନେଇ କେବେ ଗଛ ମୂଳେ ତ ଆଉ କେବେ ଭଡା ଘରେ। ଏହି ସମସ୍ୟା କେଉଁ ବେସାହାରା ଲୋକର କାହାଣୀ ନୁହେଁ। ବରଂ ଏମିତି ଗଢା ହେଉଛି ଆମ ଦେଶର ଭବିଷ୍ୟତ। ବେରୋଜଗାରୀ ଓ ବେକାରୀର ଟୀକା ପିନ୍ଧିଥିବା ଓଡିଶାରେ ଏ ହେଉଛି ଶିକ୍ଷାର ବିକଳ ଚିତ୍ର। ଖୋଲା ଆକାଶ ସହ ଜନ୍ତୁଙ୍କ ମେଳିରେ ଚାଲିଛି କୋମଳମତି ଶିଶୁଙ୍କ ବିକାଶର ପାଠଶାଳା। ଯେଉଁଠି ନାଚି ଖେଳି ପାଠ ପଢୁଛନ୍ତି କାଲିର ଭବିଷ୍ୟତ। ଏ ଦୃଶ୍ୟ ହେଉଛି ଆଦିବାସୀ ବହୁଳ ମୟୁରଭଞ୍ଜ ଜିଲ୍ଲା ମୋରଡ଼ା ବ୍ଲକ ସମାଇଡ଼ିହି ଅଙ୍ଗନବାଡି କେନ୍ଦ୍ରର।
ଅଙ୍ଗନବାଡ଼ି କେନ୍ଦ୍ରର ଅବ୍ୟବସ୍ଥା, ଗଛମୂଳେ ପଢା ହେଉଛି ଅ, ଆ...
ଜିଲ୍ଲାରେ ମୋଟ ୪୮୮୦ ଟି ଅଙ୍ଗନବାଡି କେନ୍ଦ୍ରରୁ ବର୍ତ୍ତମାନ ପର୍ଯ୍ୟନ୍ତ ୪୦୨୩ ଟି ଅଙ୍ଗନବାଡି କେନ୍ଦ୍ରର ନିଜସ୍ବ ଗୃହ ଥିବାବେଳେ ୩୨୭ ଟି ଅଙ୍ଗନବାଡି କେନ୍ଦ୍ରର ଗୃହ ନିର୍ମାଣ କାମ ଜାରିରହିଛି। ୪୦୧ ଟି ଅଙ୍ଗନବାଡି କେନ୍ଦ୍ର ଭଡାଘରେ ଏବଂ ୧୨୯ ଟି ଅଙ୍ଗନବାଡି କେନ୍ଦ୍ର କମ୍ୟୁନିଟି ହଲ ଓ କ୍ଲବ ଘରେ ଚାଲିଛି।